Россия махсус хизматлари томонидан давлатга хиёнатда айбланган олим, Арктик фанлар академияси президенти Валерий Митко 81 ёшида вафот этди. Бу ҳақда уни ҳимоя қилиб келган «Первий отдел» адвокатлар ва ҳуқуқ ҳимоячилари жамияти маълум қилди.
Митко 2020 йилдан буён уй қамоғида ўтирган. Унинг адвокатлари айтишича, сўнгги пайтларда олим учун «кўп тез ёрдам чақириларди, касалхонага тез-тез юбориларди». «У на юра оларди, на ўтира оларди ва на тўшакка михланган рафиқасига қарай оларди», — дея маълум қилишди «Первий отдел»да.
«Профессор Валерий Митко Россия репрессив тизими томонидан азоб берилган яна бир олимга айланди. Ўзи қилмаган жиноятлар учун судланган ҳолда, уй қамоғида ўлди — аммо у шунчалик севган қутб кенгликларини энди ҳеч ким ундан олиб қўёлмайди», — дейилади хабарда.
Тергов даъволарига кўра, 2016 йилдан буён Хитойдаги Далян денгиз университетида таклиф этилган профессор сифатида дарс берган Валерий Митко Хитой махсус хизматларига махфий ахборотни сотган. Олим ўзини айбдор деб тан олмади ва у, гўёки, Хитойга узатган маълумотларнинг барчаси очиқ тармоқда мавжудлигини айтди.
Олим, шу жумладан, арктик ва шимолий ҳудудларда экологик хавфсизлик муаммолари, амалий гидрофизика, ахборот тизимлари билан шуғулланган. У 400 дан ортиқ илмий ишлар, монографиялар, ихтиролар, патентлар муаллифидир.
Изоҳ (0)