Rossiya maxsus xizmatlari tomonidan davlatga xiyonatda ayblangan olim, Arktik fanlar akademiyasi prezidenti Valeriy Mitko 81 yoshida vafot etdi. Bu haqda uni himoya qilib kelgan “Perviy otdel” advokatlar va huquq himoyachilari jamiyati ma’lum qildi.
Mitko 2020-yildan buyon uy qamog‘ida o‘tirgan. Uning advokatlari aytishicha, so‘nggi paytlarda olim uchun “ko‘p tez yordam chaqirilardi, kasalxonaga tez-tez yuborilardi”. “U na yura olardi, na o‘tira olardi va na to‘shakka mixlangan rafiqasiga qaray olardi”, — deya ma’lum qilishdi “Perviy otdel”da.
“Professor Valeriy Mitko Rossiya repressiv tizimi tomonidan azob berilgan yana bir olimga aylandi. O‘zi qilmagan jinoyatlar uchun sudlangan holda, uy qamog‘ida o‘ldi — ammo u shunchalik sevgan qutb kengliklarini endi hech kim undan olib qo‘yolmaydi”, — deyiladi xabarda.
Tergov da’volariga ko‘ra, 2016-yildan buyon Xitoydagi Dalyan dengiz universitetida taklif etilgan professor sifatida dars bergan Valeriy Mitko Xitoy maxsus xizmatlariga maxfiy axborotni sotgan. Olim o‘zini aybdor deb tan olmadi va u, go‘yoki, Xitoyga uzatgan ma’lumotlarning barchasi ochiq tarmoqda mavjudligini aytdi.
Olim, shu jumladan, arktik va shimoliy hududlarda ekologik xavfsizlik muammolari, amaliy gidrofizika, axborot tizimlari bilan shug‘ullangan. U 400 dan ortiq ilmiy ishlar, monografiyalar, ixtirolar, patentlar muallifidir.
Izoh (0)