Трамп Россия ва Украинага ўз воситачилигини таклиф қилди

АҚШ собиқ президенти Дональд Трамп Россия ва Украина ўртасидаги музокаралар гуруҳига раҳбарлик қилишга қизиқиш билдирди, деб ёзади Business Insider.

«Стратегик бўлинг, ақлни ишлатинг. Ҳозир айни келишувни тугаллаш вақти. Ҳар икки томон ҳам бунга муҳтож ва буни хоҳлайди. Бутун дунё хавф остида. Томонларнинг гуруҳига раҳбарлик қилайми?» — деб ёзган Трамп.

Трамп, шунингдек, «Шимолий оқим» қувури саботаж қилинганига ишончи комил эканини айтди ва «жиддий кескинлик ёки уруш» хавфидан огоҳлантирди. АҚШ собиқ президенти мамлакат расмийларини «Шимолий оқим» билан боғлиқ воқеаларга совуққон ва вазмин муносабатда бўлишга чақирди. Ҳодиса «катта қарорга сабаб бўлмаслиги керак, ҳеч бўлмаганда ҳозирча», деб огоҳлантирди Трамп.

Аввал Трамп агар у президентлик лавозимини сақлаб қолганида Украинада жанговар ҳаракатлар бошланмаслигига ишонч билдирган эди. «Агар Москва ва Киев ўртасида музокаралар бўлмаса, ўлим ва ҳалокатдан бошқа ҳеч нарса қолмайди», — деган АҚШнинг собиқ президенти.