29 сентябрь куни Ўзбекистон ҳукумати ва БМТ Қочқинлар бўйича Олий комиссари бошқармаси томонидан Покистонда содир бўлган ҳалокатли сув тошқинидан жабрланганларга тақдим этилган инсонпарварлик ёрдами юкланган самолёт Термиздан Карачига учиб кетди, деб хабар қилмоқда «Дунё» АА.
Қайд этилишича, бу биринчи қўшма инсонпарварлик ёрдами бўлиб, юклар Ўзбекистон Мудофаа вазирлиги томонидан тақдим этилган самолётларда етказиб берилади. Инсонпарварлик кўмаги таркиби сув тошқинлари оқибатида ўз бошпаналаридан айрилганлар учун 15 тоннадан ортиқ ҳажмдаги вақтинча яшаш учун мўлжалланган турар жой модулларидан иборат.
Сурхондарё вилояти ҳокимлиги матбуот хизматининг маълум қилишича, инсонпарварлик ёрдами юклари даставвал БМТ Қочоқлар бўйича Олий комиссарининг Сурхондарё вилоятидаги Минтақавий гуманитар-логистик марказига келтирилди.
2022 йилнинг июнида президенти томонидан Termez Cargo Centre мажмуасига Гуманитар ёрдам кўрсатиш бўйича халқаро кўп функцияли транспорт-логистика хаби мақоми берилганди.
БМТнинг Қочоқлар бўйича Олий комиссари бошқармаси Покистондаги сув тошқинларидан энг кўп зарар кўрган ҳудудлардаги маҳаллий ҳокимликларга шу кунгача 1 миллиондан ортиқ бирламчи зарурий буюмларни топширди.
«Биз Ўзбекистон Ҳукуматининг қўллаб-қувватлови орқали БМТнинг Қочоқлар бўйича Олий комиссари бошқармаси фавқулодда вазиятларда тезкор гуманитар ёрдам кўрсатиш имконига эга бўлаётганини юксак баҳолаймиз», — дея эътироф этган БМТ ҚОКБнинг Марказий Осиё бўйича вакили Ханс Фридрих Шоддер.
Сўнгги маълумотларга қараганда, сув тошқинлари натижасида Покистоннинг 7,6 миллионга яқин аҳолиси ўзи истиқомат қиладиган ҳудудлардан кўчирилган, шундан деярли 600 минг нафари ижтимоий кўмак бериладиган бошпаналарда яшаяпти. Мамлакат расмийлари энг кўп талофат кўрган туманларда тошқин сувларининг чекиниши олти ойгача давом этиши мумкинлигидан огоҳлантирмоқда.
1 сентябрь куни Исломобод халқаро аэропортига Ўзбекистон ҳарбий-ҳаво кучларининг Ил-76 самолёти келиб қўнди. Унга Президент Шавкат Мирзиёев топшириғига биноан, Покистон минтақаларида рўй берган сув тошқинидан жабрланганлар учун йўлланган 40 тоннадан ортиқ ҳажмдаги инсонпарварлик ёрдами юкланган эди. Аэропортда юкларни Покистон илм-фан ва технологиялар бўйича федерал вазири Ага Хасан Балоч қабул қилиб олди.
Изоҳ (0)