АҚШ Давлат департаменти делегацияси 3—6 октябрь кунлари Ўзбекистонга ташриф буюради. «Дунё» АА нинг ёзишича, бу ҳақда АҚШ Давлат котиби ёрдамчиси вазифасини бажарувчи, Давлат департаментининг Халқаро жамоатчилик билан алоқалар бюроси раҳбари Элизабет Трюдо элчи Жавлон Ваҳобов билан бўлиб ўтган мулоқотда маълум қилган.
Элизабет Трюдо ўзаро ҳамкорликни ривожлантиришнинг истиқболли йўналишларини ва республиканинг инсон салоҳиятини мустаҳкамлашга қаратилган қўшма ташаббусларни амалга оширишни муҳокама қилиш ниятида эканлигини ҳам айтган.
Хусусан, Америка делегациясининг Ўзбекистонда ташрифи давомида Олий Мажлис, Миллий оммавий ахборот воситаларини қўллаб-қувватлаш ва ривожлантириш жамоат фонди, олий ўқув юртларида учрашув ва музокаралар, шунингдек, Жиззах ва Тошкент вилоятларига ташрифлар режалаштирилган.
Учрашув якунлари бўйича Давлат департаменти вакили барча соҳаларда икки томонлама муносабатларни сифат жиҳатдан ривожлантиришга хизмат қилувчи давлат раҳбарлари ва алоҳида соҳалар раҳбарлари даражасидаги Америка делегацияларининг Ўзбекистонга ташрифини кенгайтиришга кўмаклашишга тайёрлигини билдирган.
Элизабет Трюдо етакчи дипломат бўлиб, аввал Шимолий Ирландия ва Покистондаги АҚШ Бош консули, АҚШнинг НАТОдаги миссияси маслаҳатчиси, АҚШнинг Жанубий Африкадаги миссияси матбуот атташеси, Давлат департаменти матбуот ишлари бўйича директори лавозимларида ишлаган. Ҳозирги лавозимига қадар у Мудофаа вазирининг жамоатчилик билан алоқалар бўйича ёрдамчисининг биринчи ўринбосари лавозимида фаолият юритган.
Изоҳ (0)