Август ойида Ўзбекистонда компаниялар фаоллиги ўсиб, брендлар муҳофазаси камайди

Август ойидаги компанияларнинг фаоллиги ва брендларни рўйхатга олиш жараёни таҳлил қилинди. Бу ҳақда «Дарё»га Иқтисодий тадқиқотлар ва ислоҳотлар маркази хабар бермоқда.

Фаолият юритаётган компаниялар бўйича компонент 2022 йил август ойида 1,0077 бирликни ташкил этиб, ўтган ойга нисбатан 0,8 фоизга ошганлигини кўрсатади.

Ушбу кўрсаткич ўтган йилнинг мос даврига нисбатан ҳам ижобий ўзгариб, 9,4 фоизга ошган.

Август ойида барча турдаги фаолият юритаётган компаниялар сони ўтган йилнинг шу даврига (610 041 бирлик) нисбатан 5 386 тага кўпайиб, 615 427 бирликни ташкил этган.

Йирик тадбиркорлик билан шуғулланувчи корхоналар сони 21 тага ошган.

Ҳисобот даврида, кичик корхоналар сони 498 214 тадан 503 426 тагача кўпайган (ўсиш 5 212 та). Фермер хўжаликлари сони 108 273 тадан 108 426 тагача (ўсиш 153 та) кўпайган.

Йирик тадбиркорлик билан шуғулланаётган субъектлар сони 3 575 тани ташкил этиб, 2022 йилнинг июль ойига нисбатан 21 тага кўпайган.

2022 йил август ойида савдо белгилари муҳофазаси бўйича бизнес фаоллиги индекси 0,9883 бирликни ташкил этиб, ушбу кўрсаткич 2022 йилнинг июль ойига нисбатан 1,2 фоизга мўътадил даражада камайган.

Жорий йилнинг август ойида юридик шахслар томонидан 337 та товар белгилари ва товар номлари рўйхатга олинган.