Тошкент метросида поезд туннелда тўхтаб қолди

26 сентябрь куни Тошкент метросида поезд «Миллий боғ» бекатида узоқроқ тўхтаб қолгани ҳақида хабар берилган эди. Метрополитен маъмурияти ҳолатга изоҳ берди.

Маълум қилинишича, «Чилонзор» йўналиши «Буюк Ипак йўли» бекатига кириб келишда 15-сонли ҳаракат таркибида техник носозлик кузатилган. Бунинг натижасида ушбу ҳаракат таркиби 7 дақиқа давомида туннелда тўхтаб қолган.

Шунингдек, ҳаракат хавфсизлигини таъминлаш мақсадида поезд нозими томонидан «Чилонзор» йўналишидаги поездлар ҳаракати мувофиқлаштирилган ҳамда ҳаракат таркиблари бекатларда ҳаракат жадвали бузилмаслиги учун белгиланган йўриқномага асосан вақтинчалик тўхтатилган.

«Машинист томонидан бажарилган техник ишлар натижасида 15-сонли маршрут ҳаракати давом этган. Ҳозирда барча поездлар белгиланган жадвал асосида ҳаракатланмоқда», — дейилади расмий хабарда.

Бундан аввал Тошкент метросида 22 август ва 16 август кунлари носозлик юзага келганди. 21 июлда эса метро поезди «Олмазор» бекатига киришдаги туннелда беш дақиқа тўхтаб қолганди.