26-sentabr kuni Toshkent metrosida poyezd “Milliy bog‘” bekatida uzoqroq to‘xtab qolgani haqida xabar berilgan edi. Metropoliten ma’muriyati holatga izoh berdi.
Ma’lum qilinishicha, “Chilonzor” yo‘nalishi “Buyuk Ipak yo‘li” bekatiga kirib kelishda 15-sonli harakat tarkibida texnik nosozlik kuzatilgan. Buning natijasida ushbu harakat tarkibi 7 daqiqa davomida tunnelda to‘xtab qolgan.
Shuningdek, harakat xavfsizligini ta’minlash maqsadida poyezd nozimi tomonidan “Chilonzor” yo‘nalishidagi poyezdlar harakati muvofiqlashtirilgan hamda harakat tarkiblari bekatlarda harakat jadvali buzilmasligi uchun belgilangan yo‘riqnomaga asosan vaqtinchalik to‘xtatilgan.
“Mashinist tomonidan bajarilgan texnik ishlar natijasida 15-sonli marshrut harakati davom etgan. Hozirda barcha poyezdlar belgilangan jadval asosida harakatlanmoqda”, — deyiladi rasmiy xabarda.
Bundan avval Toshkent metrosida 22-avgust va 16-avgust kunlari nosozlik yuzaga kelgandi. 21-iyulda esa metro poyezdi “Olmazor” bekatiga kirishdagi tunnelda besh daqiqa to‘xtab qolgandi.
Izoh (0)