Туркманистон президенти Сердар Бердимуҳамедов Мустақиллик куни (27 сентябрь) муносабати билан Туркманистоннинг 829 фуқароси ва 4 нафар чет эл фуқаросини афв этиш тўғрисидаги фармонни имзолади. Бу ҳақда «Туркменистан сегодня» агентлиги хабар берди.
Туркманистоннинг Фуқаролик ва афв этиш масалалари бўйича таклифлар тайёрлаш комиссияси раиси, мудофаа вазири Бегенч Гундоғдиевга афв этилган фуқароларнинг тезроқ уйга қайтишини таъминлаш чораларини кўриш топширилди.
Вилоятлар, этраплар ва шаҳарлар ҳокимлари, бошқа мутасадди раҳбарларга қамоқдан озод этилган шахсларни ишга жойлаштириш топширилди.
Туркманистонда афв этиш акциялари йилига 3-4 марта, йирик байрамлар муносабати билан ўтказилади. Сердар Бердимуҳамедов охирги марта 22 апрель куни Гадйр гижеси шарафига 514 нафар маҳкумни афв этган эди.
Изоҳ (0)