Serdar Berdimuhamedov Turkmaniston mustaqilligi kuni munosabati bilan 833 nafar mahbusni afv etdi
Turkmaniston prezidenti Serdar Berdimuhamedov Mustaqillik kuni (27-sentabr) munosabati bilan Turkmanistonning 829 fuqarosi va 4 nafar chet el fuqarosini afv etish to‘g‘risidagi farmonni imzoladi. Bu haqda “Turkmenistan segodnya” agentligi xabar berdi.
Turkmanistonning Fuqarolik va afv etish masalalari bo‘yicha takliflar tayyorlash komissiyasi raisi, mudofaa vaziri Begench Gundog‘diyevga afv etilgan fuqarolarning tezroq uyga qaytishini ta’minlash choralarini ko‘rish topshirildi.
Viloyatlar, etraplar va shaharlar hokimlari, boshqa mutasaddi rahbarlarga qamoqdan ozod etilgan shaxslarni ishga joylashtirish topshirildi.
Turkmanistonda afv etish aksiyalari yiliga 3-4 marta, yirik bayramlar munosabati bilan o‘tkaziladi. Serdar Berdimuhamedov oxirgi marta 22-aprel kuni Gadyr gijesi sharafiga 514 nafar mahkumni afv etgan edi.
