Шимолий Корея 25 сентябрь куни Япон денгизига яна баллистик ракета учирди, деб хабар бермоқда NHK агентлиги Жанубий Корея штаб бошлиқлари бирлашган қўмитасига таяниб.
Қўмита Шимолий Пхеньян вилоятидан қисқа масофали баллистик ракета учирилганини аниқлади. Ундаги маълумотларга кўра, ракета тахминан 600 км масофани босиб ўтган, максимал парвоз баландлиги тахминан 60 км, тезлиги эса 5 Мах (6125 км/соат) атрофида бўлган.
Жанубий Корея ва АҚШ разведка идоралари «бошқа тафсилотларни аниқлаш учун батафсил таҳлил ўтказмоқда».
Yonhap агентлигининг ёзишича, ракета учирилганидан кўп ўтмай, Жанубий Корея штаб бошлиқлари бирлашган қўмитаси раиси Ким Син Гюм ва АҚШнинг Жанубий Кореядаги ҳарбий контингенти қўмондони Пол Лакамера хавфсизликни мувофиқлаштиришни муҳокама қилган ва «Шимолий Кореянинг ҳар қандай таҳдидлари ва провокацияларига қарши биргаликда мудофаа позициясини янада кучайтиришга келишиб олган».
Шимолий Корея ракетасининг учирилиши Жанубий Кореянинг Пусан портига АҚШнинг Роналд Реаган авиаташувчиси бошчилигидаги зарба берувчи гуруҳ етиб келган вақтга тўғри келмоқда.
Гуруҳ Пусанга АҚШ ва Жанубий Кореянинг беш йил ичида биринчи қўшма ҳарбий-денгиз машқларида иштирок этиш учун келган эди.
Гуруҳ таркибига авиаташувчи кемадан ташқари Chancellorsville ракета крейсери ва Barry эсминеци ҳам киради. Машқларда Американинг Аннаполис атом сувости кемаси ҳам иштирок этиши режалаштирилган.
Машқлар шу ой охирида Жанубий Кореянинг шарқий қирғоқларида бўлиб ўтади.
Изоҳ (0)