Shimoliy Koreya Yapon dengiziga yana ballistik raketa uchirdi
Shimoliy Koreya 25-sentabr kuni Yapon dengiziga yana ballistik raketa uchirdi, deb xabar bermoqda NHK agentligi Janubiy Koreya shtab boshliqlari birlashgan qo‘mitasiga tayanib.
Qo‘mita Shimoliy Pxenyan viloyatidan qisqa masofali ballistik raketa uchirilganini aniqladi. Undagi ma’lumotlarga ko‘ra, raketa taxminan 600 km masofani bosib o‘tgan, maksimal parvoz balandligi taxminan 60 km, tezligi esa 5 Max (6125 km/soat) atrofida bo‘lgan.
Janubiy Koreya va AQSH razvedka idoralari “boshqa tafsilotlarni aniqlash uchun batafsil tahlil o‘tkazmoqda”.
Yonhap agentligining yozishicha, raketa uchirilganidan ko‘p o‘tmay, Janubiy Koreya shtab boshliqlari birlashgan qo‘mitasi raisi Kim Sin Gyum va AQSHning Janubiy Koreyadagi harbiy kontingenti qo‘mondoni Pol Lakamera xavfsizlikni muvofiqlashtirishni muhokama qilgan va “Shimoliy Koreyaning har qanday tahdidlari va provokatsiyalariga qarshi birgalikda mudofaa pozitsiyasini yanada kuchaytirishga kelishib olgan”.
Shimoliy Koreya raketasining uchirilishi Janubiy Koreyaning Pusan portiga AQSHning Ronald Reagan aviatashuvchisi boshchiligidagi zarba beruvchi guruh yetib kelgan vaqtga to‘g‘ri kelmoqda.
Guruh Pusanga AQSH va Janubiy Koreyaning besh yil ichida birinchi qo‘shma harbiy-dengiz mashqlarida ishtirok etish uchun kelgan edi.
Guruh tarkibiga aviatashuvchi kemadan tashqari Chancellorsville raketa kreyseri va Barry esminetsi ham kiradi. Mashqlarda Amerikaning Annapolis atom suvosti kemasi ham ishtirok etishi rejalashtirilgan.
Mashqlar shu oy oxirida Janubiy Koreyaning sharqiy qirg‘oqlarida bo‘lib o‘tadi.
