Кремль Абхазия ва Жанубий Осетия аҳолисини урушга сафарбар қилиш ҳақида ўйламоқда — ОАВ
Кремль Украина билан урушга нафақат россияликларни, балки ўзини ўзи республика деб эълон қилган Абхазия ва Жанубий Осетия фуқароларини ҳам сафарбар этиш имкониятини кўриб чиқмоқда. Бу ҳақда Россия президенти маъмуриятига яқин манба Meduza’га маълум қилди.
Суҳбатдошнинг айтишича, Абхазия ва Жанубий Осетия республикаларидан бир неча минг киши мажбурий равишда хизматга чақирилиши мумкин.
Дунёнинг аксарият давлатлари Абхазия ва Жанубий Осетияни Грузия ҳудуди деб билади. 2008 йилда Грузия билан урушдан кейин Россия уларнинг мустақиллигини расман тан олди; бу республикаларнинг маъмуриятлари Кремль томонидан назорат қилинади. 2022 йилда Жанубий Осетия президенти Россия билан «бирлашиш» бўйича «қонуний қадамлар» ҳақида эълон қилганди.
Украина оммавий ахборот воситалари Жанубий Осетия ҳарбий хизматчиларининг урушда қатнашаётгани ҳақида ёзган. Март ойида жанубий осетиялик муддатли ҳарбий хизматчилар гуруҳи урушда қатнашишдан бош тортгани ва уйга қайтгани ҳақида хабар берилган.
21 сентябрь куни Украинанинг қарши ҳужуми муваффақияти фонида Россияда сафарбарлик эълон қилинди. Россия ҳукумати 300 000 ҳарбий хизматчини чақириш режасини эълон қилди; Норасмий маълумотларга кўра, бир миллиондан ортиқ одам сафарбар қилиниши мумкин. Шу билан бирга, Украинанинг босиб олинган ҳудудларида «Россияга қўшилиш бўйича референдумлар» бўлиб ўтмоқда; тасдиқланмаган маълумотларга кўра, расмий аннексия сентябрь ойининг охиригача амалга оширилиши мумкин.
