Сўнгги ҳафталарда Россия президенти Украинадаги урушни стратегик режалаштиришда янада фаолроқ иштирок эта бошлади, деб ёзади Meduza. Масалан, The New York Times газетаси америкалик мансабдорларга таяниб маълум қилишича, Владимир Путин Россия ҳарбийларининг Херсондан чекиниш ҳақидаги илтимосини рад этган.
Херсондан кетиш орқали россиялик ҳарбийлар техника ва шахсий таркибни сақлаб қолган ҳолда, уюшган тарзда Днепр ортига чекинган бўларди. Аммо бундай чекиниш Путиннинг урушдаги мағлубиятининг омма олдида яна бир марта таҳқирли тан олиши бўлган бўларди ва Украинага бир ой ичидаги иккинчи йирик ғалабани келтирган бўларди», — деб ёзади NYT.
Нашр манбаларига кўра, Путин генералларга жойлардаги стратегик қарорлар шахсан унинг ўзи томонидан қабул қилинишини айтган. Бу ҳарбийлар орасида кескинликни юзага келтирган, Херсондан қўшинларни олиб кетиш таклифи Путин томонидан қабул қилинмагани эса россиялик ҳарбий хизматчилар маънавий руҳининг тушишига сабаб бўлган — улар таъминот линиясидан узилиб қолгани туфайли қийин аҳволда қолишларини тахмин қилмоқда.
Сентябрь ўрталарида Украина президенти Владимир Зеленский ой бошидан бери украиналик ҳарбийлар мамлакат шарқи ва жанубида Россия ишғоли остидаги олти минг квадрат километрдан ортиқ ҳудудни озод қилганини айтганди.
Август ойи охирида Украина қуролли кучлари Херсон вилоятига, сентябрь ойи бошида Харьков вилоятига қарши ҳужум бошлади. Харьков йўналишидаги ҳужум уруш бошидан бери энг муваффақиятли бўлди. Харьков вилояти раҳбари Олег Синегубов 11 сентябрь куни Украина ҳарбийлари сентябрь бошидан буён минтақадаги 40 дан ортиқ шаҳар ва қишлоқларни озод қилганини айтди.
Мавзуга доир:
- Украина ҳарбийлари озод қилинган ҳудудларда байроқ кўтармоқда. Николаевда кема чўкиб кетди. Урушнинг 199-кунидан фоторепортаж
- Зеленский Украина жануби ва шарқида учта аҳоли пункти озод этилганини эълон қилди
- Украина армияси Херсон вилоятига ҳужум ҳақида маълум қилди. Россия Мудофаа вазирлиги «у шармандаларча муваффақиятсизликка учрагани»ни айтмоқда
Изоҳ (0)