Қашқадарё вилоятининг Миришкор тумани ҳокими Шерали Санаев жорий мавсумда тумандаги пахта далаларида меҳнат қилган теримчилар учун 100 миллиард сўм терим пули ажратилганини маълум қилди. Бу ҳақда «Дарё»га туман ҳокимлиги ахборот хизмати раҳбари Азизбек Яздурдиев хабар берди.
Маълум бўлишича, Миришкор туманида жорий пахта мавсумида 1036 та фермер хўжалиги 19,1 минг гектар ер майдонига чигит эккан бўлиб, 7 сентябрдан бошлаб йиғим-терим ишларини бошлаган.
Айтилишича, етиштирилган пахта ҳосилини нест-нобуд қилмасдан, қисқа муддатларда сифатли қилиб териб олиш, теримга фермер хўжалиги аъзолари ва уюшмаган аҳолини кўнгилли тарзда жалб этиш бўйича барча зарурий чоралар кўрилган бўлиб, терим ишлари жадал давом этмоқда.
Эътиборга молик яна бир жиҳати шундаки, туман ҳокими Шерали Санаев ташаббуси ва ҳудудда мавжуд пахтачилик кластерлари ҳамкорлигида мавсум бошидан юқори натижа қайд этиб, шартномавий режаларини биринчилар қаторида бажараётган фермер хўжаликлари раисларига қимматбаҳо совғалар берилмоқда. Хусусан, тумандаги «Тўлқин Бердиев», «Зафар зар тупроғи», «Шоймардонов Даврон», «Тошев Рўзимурод», «Шарапов Алишерхон» ва бошқа бир қатор фермер хўжаликлари юқори ҳосилдорлик олиб, биринчилар қаторида шартномавий режаларини бажаришди», — дейди Азизбек Яздурдиев.
Айтилишича, мавсум бошидан 245 нафар отряд раҳбари, 45 нафар маҳалла раиси, 47 нафар ўз кўмагини аямаётган ФВБ ходими ва 16 нафар МMTP раиси ана шундай қимматбаҳо совғаларга эга чиққан.
Туман ҳокими Шерали Санаевнинг маълумот беришича, жорий мавсумда Миришкордаги пахта йиғим-теримига 15 минг уюшмаган аҳоли кўнгилли тарзда жалб этилган бўлиб, уларнинг терими учун 100 миллиард сўм маблағ сарфланиши режалаштирилган.
Теримни яхши кайфиятда бошлаб олдик. Кунига 150-200 килодан пахта тераман. Ҳар мавсумда 10-15 миллион сўмдан ортиқ қўшимча даромад оламан. Бундан ташқари рағбатлантиришади, ун, ёғ беришади. Терим пулларини далага нақд шаклда олиб келиб беришади. Насиб қилса бу мавсум ҳам фаол бўламиз», — дейди фаол теримчилардан бири Фароғат Алимова.
Изоҳ (0)