Россияда эркаклар сафарбарликка кузатилмоқда, Донецкда янги қурбонлар. Урушнинг 211-кунидан фоторепортаж
22 сентябрь куни Владимир Путин томонидан эълон қилинган сафарбарликнинг иккинчи куни ўтди — Россияда эркаклар ёппасига чақирув қоғозини олмоқда. Кремль расман фақат ҳарбий тажрибага эга бўлган захирадагилар орасидан 300 минг киши чақирилишини маълум қилган бўлса-да, ҳарбий комиссариатга чақирилаётганлар орасида умрида армияга бормаганлар, шунингдек намойишчилар, журналистлар ва ҳарбий хизматга яроқсиз бўлганлар ҳам учрамоқда. «Новая газета. Европа» маълумотига кўра, президент фармонининг ошкор этилмаган 7-бандида бир миллионгача одамни сафарбар этиш кўзда тутилган, бу маълумотни Кремлдагилар «ёлғон» деб атади. Россияда сафарбарлик кетаётган чоғда Харьковнинг шаҳар-қишлоқларида Россия кучлари истилосидан қолган вайронагарчиликларни рўйхатга олиш давом этмоқда. 22 сентябрь куни ДХР маркази Донецк шаҳри ҳудуди Украина қуролли кучлари томонидан ўққа тутилди. Meduza урушнинг 211-кунига оид суратларни жамлади.
Россияда сафарбарлик
Москвада қўлига З ҳарфи (Украинадаги урушни қўллаб-қувватлаш рамзи) туширилган россиялик аскарлар граффитиси. Фото 22 сентябрь куни — сафарбарлик эълон қилинганидан кейинги куни олинганФото: Getty Images
Сафарбарликка чақирув қоғози олган москвалик ёшлар ҳарбий комиссариат биноси олдида навбатда турибди. Москвада айнан қанча одам хизматга чақирилгани маълум қилинмаган. Пойтахт мериясининг сафарбарлик тўғрисидаги буйруғида захирада бўлган, лекин ҳали чақирув қоғози олмаганларга шаҳардан чиқиш тақиқланиши ҳақида банд йўқ.Фото: «ТАСС»
Доғистон пойтахти Маҳачқалъада ҳарбий хизматга чақирилган эркакнинг қариндошлари республика чақирув пункти яқинида уни кузатишмоқда.Фото: «ТАСС»
Украина билан урушга чақирилган доғистонликлар Маҳачқалъадаги республика чақирув пунктига келмоқда.Фото: «ТАСС»
Маҳачқалъадаги республика чақирув пунктида сафарбар қилинганлар ва уларнинг қариндошлари. Бу вақтда Доғистоннинг бошқа қисмида сафарбарликка қарши одамлар федерал трассани тўсиб қўйишди, ҳарбий комиссариат биноларидан бири олдига йиғилиб, сафарбарликка эътироз билдиришди.Фото: «ТАСС»
Бурятияда сафарбар қилинганлар ҳарбий комиссариат олдидаги микроавтобусда. Бу одамларни Украина билан урушга юбориш учун тунда квартираларидан олиб кетишган ва ҳарбий комиссариатга келтиришган. «Люди Байкала» баҳолашича, Бурятиядан олти-етти минг киши сафарбар қилиниши мумкин.Фото: «Люди Байкала»
Донецкнинг ўққа тутилиши қурбонлари
Донецк шаҳри марказида — Ворошиловский туманидаги йўлда ётган жасад. Маҳаллий маъмуриятга кўра, шаҳар 22 сентябрь куни ўққа тутилган ва камида олти киши ҳалок бўлган.Фото: «ТАСС»
Россия назоратидаги Донецкнинг ўққа тутилиши вақтида Ёпиқ бозор яқинида ҳалок бўлган киши жасади.Фото: «ТАСС»
Изоҳ (0)