Қирғизистон президенти Садир Жапаров қўшни давлатлар билан чегара масаласини ҳал қилиш учун ердан воз кечмаслигини айтди. У республика армиясининг ҳозирги ҳолати ҳақида ҳам гапирди.
Жапаровнинг қайд этишича, Қирғизистоннинг амалдаги ҳукумати аввалги президентлар бериб юборган ерларни қайтариб олмоқда. Тез орада жамият гап нима ҳақида кетаётганини билиб олади.
Мен аввалгилар каби хиёнаткор эмасман. Чегара масаласини ҳал қилиш учун ердан воз кечмайман. Биз ҳар сантиметр ер учун охирги томчи қонимизгача курашишимиз керак. Қирғизистон ери бировнинг мулки эмас. Ота-боболаримиз бунинг учун жонларини аямаган. Биз бундан афсусланмаймиз. Келажак авлод ҳам афсусланмаслиги керак. Негаки, бу ерни келажак авлодга қолдириш мақсадида ота-боболаримиздан қарз сифатида олганмиз. Бу ер меники ё сизники эмас. Бу минглаб йиллар давомида яшайдиган қирғиз халқининг келажак авлодлари замини, — деди Жапаров «Кабар» давлат агентлигига берган интервьюсида.Шунингдек, Садир Жапаров қирғиз армиясининг ҳозирги ҳолати ҳақида ҳам гапирди.
Ҳокимиятга келганимда армия ва бошқа ҳуқуқ-тартибот идораларининг аҳволи ачинарли эди. Буни хавфсизлик кучлари ҳам тасдиқлайди. Тўғрисини айтсам, ўтган йили апрель ойида Тожикистон ҳужуми пайтида ҳарбийларимизда автоматдан бошқа ҳеч нарса йўқ эди. Ўнта танкдан фақат иккитасини олиб бора олдик. Аммо улар беш километр юришга ҳам ярамади. Танклар 70—80 йиллардан қолган, аккумуляторлар йўқ. Бирорта ҳам қирувчи ёки вертолёт йўқ эди. Армияни шу аҳволда қабул қилиб олгандим.14 сентябрь куни Қирғизистон ва Тожикистон ўртасидаги муносабатлар кескинлашган эди. Давлатлар бир-бирини ўт очишни тўхтатиш режимини бузганликда айблаган ва чегара қишлоқлари бир неча кун ўққа тутилган.Йил давомида армияни кучайтириш учун ҳамма нарсани қилдим. Аскарларнинг рационини икки баравар оширдим. Имконият даражасида замонавий қуроллар билан таъминладим. Худога шукур, ҳозир биз кучлимиз. Тажовузкорларга қарши туриш учун кучимиз етарли. Адекват жавоб бера оламиз, — дея сўзини якунлади Қирғизистон президенти.
19 сентябрь куни кечқурун Қирғизистон ва Тожикистон чегарадаги вазиятни барқарорлаштириш ва икки давлат ўртасида тинчлик ўрнатиш тўғрисида протокол имзолаган.
Садир Жапаров Тожикистон билан чегарадаги воқеалар юзасидан баёнот эълон қилиб, унинг мамлакати ўз ерининг бир метрини ҳам бермаслигини айтган.
Изоҳ (0)