Ижтимоий тармоқларда Намангандаги далалардан бирида қорамол отиб ўлдирилгани акс этган видео тарқалганди. Вилоят ички ишлар бошқармаси тарқалган хабар юзасидан расмий маълумот берди.
Аниқланишича, мазкур ҳолат Уйчи туманида содир бўлган. Шундан сўнг видеотасвирдаги фуқаролар туман ИИБга келтирилиб, ҳолат юзасидан дастлабки суриштирув ишлари олиб борилган.
Суриштирувлар натижасида видеотасвирда иштирок этган фуқароларнинг шахсига аниқлик киритилган. Хусусан, ов қуролини кўтарган шахс Уйчи тумани ободонлаштириш бўлими ходими экани, ов қуролидан фойдаланиш ҳуқуқи мавжудлиги маълум бўлди. Шу сабабдан дала майдонида қассоблар ундан бир бош қорамолини отиб беришини сўрагани билдирилди.
Бундан 2–2,5 ҳафта олдин қассоблар мол қочиб кетганини айтиб чақирди. Ўша молни отиб беришимни сўради. Бу видео интернетда тарқаб кетгандан кейин кўпчиликнинг эътирозига сабаб бўлибди. Ҳаммангиздан кечирим сўрайман, — дейди ходим.Жараёнга қизиқиб келган яна бир шахс эса қорамолнинг отилишини телефонида тасвирга олиб, интернетда тарқатиб юборган. У воқеа жойига одамлар тўпланганини кўриб, боргани, съёмка қилиб, видеони дўстига юборгани, интернетга чиқиб кетишини билмаганини айтди.
Ҳолатга алоқадор барча фуқаролар билан профилактик суҳбат ўтказилиб, Маъмурий жавобгарлик тўғрисидаги кодекснинг 111- (ҳайвонларга нисбатан шафқатсиз муносабатда бўлиш) ва 183- (майда безорилик) моддаларига асосан ҳужжатлар расмийлаштирилди ва суд органларига тақдим этиш чоралари кўрилмоқда.
Мавзуга доир:
Изоҳ (0)