Йўловчиларга хизмат кўрсатиш сифатини яхшилаш мақсадида, хусусан, «Тошкент йўловчи вагонларини қуриш ва таъмирлаш заводи» акциядорлик жамияти томонидан мавжуд вагон паркини кенгайтириш мақсадида турли тоифадаги вагонларини ишлаб чиқариш борасида қатор ишлар олиб борилмоқда. Бу ҳақда «Ўзбекистон темир йўллари» АЖ ахборот хизмати хабар берди.
Қайд этилишича, Шавкат Мирзиёев раислигида бўлиб ўтган видеоселектор йиғилишида белгиланган топшириқларни бажариш борасида қатор ишлар амалга оширилмоқда. Жумладан, фақатгина жорий ойнинг охирига қадар завод томонидан 20 дона йўловчи вагони капитал таъмирдан сўнг фойдаланишга топширилади, улардан 8 таси пласкарта тоифадаги вагонлардан иборат бўлади. Келгусида ушбу завод ҳар ойда 20 та йўловчи вагонини таъмирдан чиқариб, уларни фойдаланишга топшириш режалаштирмоқда.
Заводда янги лойиҳаларни амалга ошириш, вагон конструкцияларини яратиш ва такомиллаштириш ҳамда уларни ишлаб чиқариш бўйича тегишли юқори малакали мутахассислари билан ҳамкорликда қатор ишлар олиб борилмоқда.
Бундан ташқари, вилоятлараро йўналишдаги поездларга бўлган юқори талабни ҳисобга олган ҳолда йўловчиларни 12 соатдан кўпроқ вақт давомида поездларда иситиш, шамоллатиш ва ҳавони мўътадиллаштириш тизимларини ўрнатиш билан боғлиқ ишлар олиб борилмоқда.
Изоҳ (0)