Актриса Адолат Кимсанова «Дарё» нашрига берган интервьюсида хусусий театрга ишлаб нафақага чиққани учун бирорта унвон ололмагани ва ундан катта миқдорда пора сўрашгани ҳақида сўзлаб берди.
— Ёш томошабинлар театридан ишдан кетгач, яна театрга қайтаман, деб ният қилардим. Рус тилида эркин сўзлашолганим учун «Илҳом» театр студиясининг раҳбари ишга чақирди. Ўша вақтда менга ишонч билдиришгани учун улардан ҳамиша миннатдорман. Чунки «Илҳом» театри орқали бўлса ҳам ўзбек санъатини хорижликларга кўрсатишга эришдим.
Абдулла Қодирийнинг асари асосида саҳналаштирилган спектаклни АҚШнинг кўплаб штатларида намойиш этдик. Ўзбек миллий нимчалари, пешанабандларини кийиб, ўзбек санъатини намойиш этганмиз. Англияда спектаклимиз ниҳоятда илиқ қабул қилиниб, томошабинлар тик туриб олқишлашганди.
Россияда ўтказиладиган «Олтин ниқоб» театр фестивалида икки марта қатнашиш бахтига эришганман. Ўзбекистонга қайтгач, хориждаги таассуротларим ҳақида бир-икки кўрсатувларда гапирмоқчи бўлганимда «Жиминг, олдин Ўзбекистонга хизмат қилиш керак, четга бориб келганингизни гапирманг», деган пайтлари бўлди. Ия, мен ўзбек санъати тарғиботи билан хорижга бордим-у, дегим келган, аммо бундай фойда йўқ экан.
Мен Шуҳрат Аббосов, Мелис Абзалов, Ҳотам Файзиев каби ўзбек режиссёр дарғалари билан ишлаган инсонман. Ҳозир ҳам ишлашга кучим бор. Аммо мен билмайдиган нимадир бор. Одамлар бориб, нималардир қилиб роллар олишяпти, аммо мен буни эплолмадим.
Инсон ҳалол меҳнат қилиб, ниятига эришади, деб билар эканман. Йўқ, ҳаётда бундай эмас экан. 50 ёшимда унвон олишим учун мендан 2 000 АҚШ доллари сўрашган. Аммо қўлимда пулим йўқлиги учун пора беролмаганман. Ўзим ойликка яшайдиган инсон бўлганим, турмуш ўртоғим ишсиз бўлгани учун одамлар ҳам қарз беришмаган. Аммо ҳалигача, ўша порани бермаганимга ачинаман. Агар ўшанда унвон олганимда анча фойдаланган бўлардим.
Нафақам ҳам юқорироқ бўларди.Аслида ижодкорга бериладиган эътиборнинг негизида ҳам шунга нарсалар ётаркан. Яъни оддий эшиттиришга чиқиш учун ҳам кимнидир рози қилиш керак экан. Афсуски, жамиятимизда коррупция илдиз отиб кетган. Бундай жамиятда яшаб, ҳалол меҳнат қилаётган инсонлар ҳеч қачон юзага чиқмайди. Яқинда ҳаётимда ички ишлар ходими аралашадиган вазият бўлиб қолди.
Кўзимни олдида ички ишлар ходими пора олди. Буни ўзига айтсам, «Нима қила оласиз? Қўлингиздан нима келади?» деди. Кўзим билган кўрганига қандай исбот керак дедим? Кейин ўз-ўзимга 50 ёшимда унвон учун 2 000 АҚШ доллари сўрашган-ку, буниси нима бўлибди, дедим, — дейди актриса Адолат Кимсанова.
Мавзуга доир:
- « ‘Тоғлик куёвъни расво қилишган» — Адолат Кимсанова турмуш ўртоғи суратга олган фильм нега телеекранларда намойиш этилмаётганига изоҳ берди (видео)
- «Мен ўлсам ҳеч ким келмаса ҳам керак» — актриса Адолат Кимсанова 50 йил ишлаб мукофот ололмагани, театрдан ишдан кетиб котиба бўлишга мажбур бўлгани ва устидан кулган унвонли актрисалар ҳақида (видео)
- «Тўртинчи инсультдан кейин тўшакка михланиб қолди». Таниқли актёр ва режиссёр Машраб Кимсановнинг оғир хасталикка чалингани маълум қилинди (видео)
Изоҳ (0)