Президент Шавкат Мирзиёев ички ва ташқи туризм салоҳиятини ошириш бўйича ўтказган видеоселектор йиғилишида Наманган вилоятининг Косонсой тумани ҳам танқид қилиниб, ҳудуд ҳокимига соҳада ўзгаришлар қилиши учун уч ой синов муддати берилди. «Дарё» мухбири Азизбек Абдувалиев Косонсой тумани ҳокими Дилмурод Қодиров билан учрашиб, танқиддан кейинги хулосалар ва келгусидаги режалар ҳақида суҳбатлашди.
Туризм учун Косонсой тумани каби жозибали ҳудудни топиш қийин. Тарихий ёдгорликлар бисёр, табиати бетакрор, сайёҳларга сифатли хизмат кўрсатиш учун инфратузилма яратилган. Фақат биз мутасаддилар бу имкониятлардан тўлақонли фойдалана олмадик ва давлат раҳбари томонидан ҳақли равишда эътироз билдирилди. Энди бу йўналишда эътиборсиз бўлиш ва сусткашлик қилишга ҳаққимиз йўқ», — дейди туман ҳокими.
Дилмурод Қодировнинг қайд этишича, икки минг йилдан ортиқ тарихга эга кўҳна Косонсойда туристларни жалб этадиган йигирмадан ортиқ археологик ва меъморий обидалар бор. Жумладан, Кушонийлар давлати пойтахти бўлган Муғтепа археологик ёдгорлиги, ўнинчи асрга оид «Ғўзапоямозор», қадимий ер ости ҳаммомлари, «Шайх Юсуфхон Эшон», «Махдуми Аъзам» зиёратгоҳлари, «Жоме’» ва «Садпири комил» масжидлари зиёрат туризмини жадал ривожлантириш учун муҳим омил бўла олади.
Туманимизда республиканинг барча вилоятлари ва қўшни давлатлар, хусусан, Қирғизистондан келадиган даволанувчиларнинг қадами узилмайдиган санаторийларимиз бор. Демак, тиббий туризмни йўлга қўйиш учун шароитлар етарли. Ёз ойлари туманимиздаги 150 дан ортиқ дам олиш масканларига кунига минглаб одам келади. Афсуски, бу масканларнинг барчаси ҳам хавфсизлик ва ташқи кўриниш борасида талабга жавоб беравермайди. Уларни қайта хатловдан ўтказиб, тадбиркорларимиз билан бамаслаҳат хорижлик сайёҳларни ҳам ўзига жалб этадиган кўринишда бошқатдан лойиҳалашни режалаштиряпмиз.Дилмурод Қодиров, Косонсой тумани ҳокими
Косонсойнинг туризм салоҳиятини янада ошириш мақсадида туман ҳокимлиги томонидан чора-тадбирлар режаси ишлаб чиқилди. Унга мувофиқ, 2022 йил якунига қадар «Олмазор» маҳалласи ҳудудида «Сўлим оби ҳаёт» МЧЖ томонидан қуриб фойдаланишга топширилган умумий қиймати 15 миллиард сўмлик «Соғломлаштириш маскани» фаолиятини кенгайтириш, «Ширин туризм хизмат кўрсатиш» МЧЖ томонидан умумий қиймати 1 миллиард сўм бўлган «Туризм хизматини ташкил этиш» лойиҳасини ишга тушириш, «Бештегирмон баракаси» оилавий корхонаси томонидан «Дам олиш масканини кенгайтириш ва меҳмон уйлари ташкил этиш» лойиҳасини амалга ошириш, «Баҳористон» маҳалласидаги мототрассада «Саванна» мотоклуби кубоки, ҳунармандларнинг вилоят фестивали ва дорбозлар ўртасида республика мусобақасини ўтказиш режалаштирилган. Жорий йил охиригача «Оилавий меҳмон уйлари» сони 70 тага етказилади, туризм объектларида Wi-Fi ҳудудлари кўпайтирилади.
Давлат раҳбари томонидан видеоселекторда айтилган «ҳар бир ҳоким менинг вилоятим, шаҳар ва туманимга сайёҳлар қаерга ва нимани кўришга келади деган саволни ўзига бериши керак» деган таъкид жуда ўринли. Туманда шу ҳақли саволга тўғри жавоб топишга қаратилган чора-тадбирларни амалга оширишга аллақачон киришдик. Бу саъй-ҳаракатларимиз йил якунига қадар самарасини беради ва Косонсой маҳаллий ҳамда хорижий сайёҳлар харитасидаги энг жозибали манзиллардан бири бўлиб қолади.Дилмурод Қодиров, Косонсой тумани ҳокими
Изоҳ (0)