ПФЛ Вадим Абрамов билан боғлиқ ҳолат бўйича «Динамо»га огоҳлантириш юборди

Ўзбекистон Профессионал футбол лигаси «Динамо» бош мураббийи Вадим Абрамовга янгиланган лицензиясини тақдим этиш учун вақт берди.

Абрамов ҳамда «Динамо» ўртасида тузилган меҳнат шартномаси жамоа ҳолатидан келиб чиқиб, вақтинча рўйхатдан ўтказилган. Ўтган вақт давомида ЎФА футбол мутахассисларини тайёрлаш маркази ПФЛ сўровига асослантирилган жавоб қайтармаган. Шунингдек, клуб ҳам мутахассис лицензиясини тақдим этиш масаласи ортга сурган. Агар Самарқанд клуби мазкур талабни бажармаса, ОФК лицензиясини қўлга кирита олмайди.

«ФИФА кунлари якунига қадар ‘Динамў мазкур ҳолатни тартибга солмаса, Вадим Абрамов 20-турдан бошлаб учрашувларда техник зонага киритилмайди», — дейилади ПФЛ баёнотида.

Маълум бўлишича, Абрамовга тегишли Про лицензиясининг муддати тугаган. Мутахассис анча вақтдан бери ушбу лицензияни янгиламай келмоқда.

Аввалроқ Абрамов Самвел Бабаян ва Миржалол Қосимов Суперлига жамоалари сонини 16 тага етказиш бўйича таклифини қўллаб-қувватлагани, шундан сўнг мутахассис ва ПФЛ бош директори Диёр Имомхўжаев ўртасида тортишув юзага келгани хабар қилинганди.

Эслатиб ўтамиз, мураббий август ойи бошидан буён «Динамо»ни бошқариб келмоқда.