Ўзбекистонда амарант ўсимлиги етиштирилмоқда (фото)

Ўзбекистонда синов тариқасида амарант ўсимлиги етиштирилмоқда. Бу ҳақда Қишлоқ хўжалиги вазирлиги хабар берди. 

Гарчи номи кўпчиликка нотаниш бўлса-да, амарант ўсимлигининг даво хусусиятлари тиббиётда маълум. Асли Америка, Европа, Африка, Осиё ва Россиянинг айрим вилоятларида ўстириладиган ушбу ўсимлик Ўзбекистонда ҳам синов тариқасида экилмоқда, — дейилади вазирлик хабарида.

Маълум бўлишича, Бухоро вилояти Ромитан тумани Қалайчорбоғ қишлоғида истиқомат қилувчи тадбиркор ушбу ўсимликнинг фойдалилик жиҳатларидан хабар топиб, уни 20 сотих ер майдонида етиштирмоқда.  

Бундан ташқари синов тарзида экилган амарант бугун ҳудуднинг тупроқ иқлим шароитига мослашиб, кутилган натижани бераётгани айтилмоқда. 

Амарантни экиш Ўзбекистонда қимматбаҳо доривор маҳсулотларни арзон нархда ўзимизда етиштириш, аграр соҳани сидерат ва серҳосил ем-хашак экин тури билан бойитиш, қишлоқ хўжалиги ва фармацевтика соҳаларида янги йўналишларни очиш, асосийси, тупроқнинг табиий унумдорлигини ошириш имкониятини яратади, — дейди Қишлоқ хўжалиги вазирлиги. 

Ўзбекистон флорасида ҳам ушбу ўсимликнинг бир авлоди ва 10 тури ўсади. Яъни ўсимликнинг манзарали тури сифатида гултожихўроз (Celasia ва Comfrena) кўп тарқалган.

Мавсум давомида амарант 3-4 марта суғорилади ва гектарига 90-100 кг азот, 70 кг фосфор, 50 кг калий билан озиқлантирилади.

Аввалроқ Ўзбекистонда кластер типидаги замонавий бозор ишга туширилгани ҳақида хабар берилган эди.