Qozog‘iston Kollektiv xavfsizlik shartnomasi tashkilotidan chiqishi haqidagi xabarlarni rad etdi

Qozog‘iston Tashqi ishlar vazirligi respublika, go‘yoki, Kollektiv xavfsizlik shartnomasi tashkiloti (KXSHT) a’zoligidan chiqishi haqidagi axborotni rad etdi, deb yozadi “RBK”.

Qozog‘iston Axborot va jamiyat taraqqiyoti vazirligi ko‘magida yaratilgan “Stopfake.kz” portali ma’lumotlariga ko‘ra, ijtimoiy tarmoqlarda va messenjerlarda Qozog‘iston 2023-yil 1-yanvardan KXSHT tarkibidan chiqishni rejalashtirayotgani haqida xabarlar tarqalgan.

“Ba’zi ijtimoiy tarmoqlarda paydo bo‘lgan, Qozog‘istonning, go‘yoki, KXSHTdan chiqishni rejalashtirayotgani haqidagi axborot mutlaqo feyk hisoblanadi va haqiqatga to‘g‘ri kelmaydi”, — deyiladi portal keltirib o‘tgan TIV xabarida.

Vazirlik tomonidan berilgan javobda qayd etilishicha, Qozog‘iston tashkilot tuzilishi jarayonining boshida turgan va uning faol ishtirokchisi hisoblanadi. “KXSHTga a’zolik mamlakatimiz milliy manfaatlariga to‘liq mos keladi… Qozog‘iston Kollektiv xavfsizlik shartnomasi tashkilotidan chiqish imkoniyatini ko‘rib chiqmayapti deb mutlaqo aniq aytish mumkin”, — deya ta’kidladi TIVdagilar.

Qozog‘istonda 2-yanvar kuni gaz narxi keskin oshishi sababli ommaviy norozilik namoyishlari boshlanib, bir necha kundan so‘ng ular tartibsizliklarga aylandi. 4 va 5-yanvar kunlari Olmaotada namoyishchilarning xavfsizlik xodimlari bilan to‘qnashuvi kuzatildi. Qozog‘istondagi tartibsizliklar fonida mamlakat bo‘ylab favqulodda holat e’lon qilindi. Mamlakat prezidenti Qosim-Jo‘mart To‘qayev KXShTdan tinchlikparvar kuchlarini yuborishni so‘radi. 6-yanvardan Qozog‘istonga KXSHT harbiylarini jo‘natish boshlandi.

11-yanvar kuni To‘qayev mamlakatdagi vaziyat barqarorlashgani, ikki kundan keyin tinchlikparvar kuchlarni olib chiqish boshlanishi mumkinligini ma’lum qildi. 19-may kuni Rossiya Qozog‘istondan tinchlikparvar kuchlarini olib chiqishni yakunladi.

To‘qayevning so‘zlariga ko‘ra, KXSHT Qozog‘iston uchun og‘ir vaziyatda ko‘mak ko‘rsatgan, ularning kelishi Olmaotani hujumchilardan ozod etish imkonini bergan. Olmaota va to‘qqizta viloyat markazlari ularning qo‘liga o‘tib ketgan payt bo‘ldi, biroq KXSHT kontingenti kelib, Qozog‘istonning eng yirik shahrini hujumchilar qo‘lidan olib qo‘yishga yordam berdi, degandi mamlakat prezidenti.

Kollektiv xavfsizlik shartnomasi tashkiloti — ayni paytda Armaniston, Belarus, Qozog‘iston, Qirg‘iziston, Rossiya va Tojikistonni o‘z ichiga olgan Yevrosiyo hukumatlararo harbiy ittifoqi. Tashkilotni tuzish haqidagi shartnoma 1992-yil 15-mayda imzolangan.

KXSHT maqsadlari tinchlikni, xalqaro va mintaqaviy xavfsizlik va barqarorlikni mustahkamlash, a’zo davlatlar mustaqilligi, hududiy yaxlitligi va suverenitetini kollektiv asosda himoyalashdan iborat.