Шавкат Мирзиёев ва Шанхай ҳамкорлик ташкилоти саммитида иштирок этиш учун Самарқандга келган Россия президенти Владимир Путин 15 сентябрь куни музокара ўтказди. Бу ҳақда президент матбуот хизмати хабар бермоқда.
Ўзбекистон раҳбари олий мартабали меҳмонни самимий қутлаб, ШҲТнинг Самарқанд саммитида иштирок этаётгани учун миннатдорлик билдирди. Владимир Путин, ўз навбатида, Шавкат Мирзиёевга ҳар доимгидек самимий меҳмондўстлик учун миннатдорлик билдирди, мамлакатлар ўртасидаги ҳамкорлик барча даражаларда жадал ва самарали ривожланиб бораётганини юксак баҳолади.
Томонлар кейинги йилларда кўп қиррали Ўзбекистон–Россия шериклиги мисли кўрилмаган юксак даражага кўтарилганини қайд этди.
Ўзаро манфаатли савдо-иқтисодий алоқалар кенгайиб бормоқда. Биргаликдаги саъй-ҳаракатлар билан товар айирбошлаш икки баробардан зиёд кўпайди, ўтган етти ойда эса ўзаро савдо 30 фоиздан ортиқ ўсди. Эътиборлиси, икки томонлама савдо ҳажмининг 70 фоизи юқори қўшилган қийматли маҳсулотлардан иборат.
Саноат кооперацияси жадал суръат билан ривожланмоқда. Кейинги йилларда кон-металлургия, ёқилғи-энергетика, кимё, қишлоқ хўжалиги, машинасозлик, тўқимачилик ва бошқа тармоқларда 100 дан ортиқ қўшма лойиҳалар бошланди.
Томонлар, энг аввало, электроника, фармацевтика, тўқимачилик ва тикув-трикотаж саноатида индустриал-технологик шерикликни ривожлантириш бўйича комплекс ҳаракатлар режасини қабул қилишга келишиб олди. Ушбу ташриф доирасида машинасозлик, кимё, нефть-кимё ва геология соҳалари бўйича 4,6 миллиард долларлик янги инвестиция битимлари имзоланаётгани қайд этилди.
Ҳамкорликни кенгайтиришда ҳудудлар ўртасидаги тўғридан-тўғри алоқалар муҳим ўрин тутади. Биринчи ярим йилликда икки мамлакат ўртасида 50 га яқин ташрифлар бўлди. Томонлар Ўзбекистон ҳудудларида қўшма саноат паркларини ташкил этиш, октябрь ойида Ўзбекистон ва Россия ҳудудларининг навбатдаги форумини ўтказишга келишиб олди.
Шунингдек, президентлар тадбирларга бой ва кенг кўламли маданий-гуманитар ҳамкорликни юксак баҳолади. Россия олий таълим муассасаларининг хориждаги филиаллари сони бўйича Ўзбекистон етакчи ўринда туради. Сўнгги тўрт йилда ушбу мамлакатнинг 12 та етакчи олийгоҳи филиаллари очилди ва жами 15 тага етди.
Туризм соҳасидаги алоқалар ҳам фаол ривожланмоқда. 2022 йилда Россиядан Ўзбекистонга келган сайёҳлар сони пандемиядан олдинги кўрсаткичлардан ошди. Учрашувда томонларни қизиқтирган минтақавий ва халқаро аҳамиятга молик масалалар юзасидан ҳам фикр алмашилди.
Учрашув якунида томонлар Ўзбекистон билан Россия ўртасидаги стратегик шериклик ва иттифоқчилик муносабатларини янада мустаҳкамлаш борасидаги интилишлари қатъий эканини яна бир бор тасдиқлади.
Изоҳ (0)