Тошкент шаҳрида 156 та тендер савдоларида қонунбузилиш ҳолатлари аниқланди
Тошкент шаҳрида ўтказилган тендер савдоларида бир қатор қонунбузилиш ҳолатлари аниқланиб, ҳуқуқни муҳофаза қилувчи органларга юборилган. Бу ҳақда Монополияга қарши курашиш қўмитаси хабар қилди.
Қайд этилишича, қўмитанинг Тошкент шаҳар ҳудудий бошқармаси томонидан ҳудудда доимий танлов (тендер) савдолари мониторинг қилиб борилади. Жорий йилнинг 8 ойи давомида шаҳардаги бюджет ва корпоратив буюртмачилар томонидан бошланғич нархи жами 2 триллион 590 миллиард 9 миллион сўмлик 1974 та танлов (тендер) савдолари ўтказилган.
Монополияга қарши курашиш қўмитасининг Тошкент шаҳар ҳудудий бошқармаси томонидан ўтказилган ўрганишлар натижасида умумий бошланғич қиймати 107 миллиард 12 миллион сўмлик 156 та тендер савдоларида «Давлат харидлари тўғрисида»ги ҳамда «Рақобат тўғрисида»ги қонунбузилиш ҳолатлари аниқланган.
Бундай қонунбузилиш ҳолатларига йўл қўйган:
- 66-сонли имконияти чекланган болалар учун ихтисослаштирилган мактаб;
- Бектемир, Миробод, Яшнобод, Мирзо Улуғбек туман мактабгача таълим бўлимлари;
- Яшнобод туман халқ таълими бўлими;
- Uzbekistan Airways Technics МЧЖ;
- Р.Глиер номидаги республика ихтисослаштирилган мусиқа мактаби;
- «Ўзбекистон темир йўллари» АЖ;
- «Кўприкқурилиш трести» УК қошидаги 13-Кўприкқурилиш отряди;
- Олмазор туман ҳокимлиги;
- Миробод туман Ободонлаштириш бошқармаси;
- «Тошкент иссиқлик маркази» ДУК Тошкент кўприклардан фойдаланиш унитар корхонаси;
- Uz Chasys МЧЖ;
- «Отель Ўзбекистон» МЧЖ;
- Кўзи ожизлар мактаб-интернати;
- Тошкент вилояти ихтисослаштирилган соматика шифохонаси;
- Тошкент давлат Ўзбек тили ва адабиёти университети қошидаги академик лицейи
23 та харидлар буюртмачилар томонидан ихтиёрий равишда бекор қилинган, 81 та харидларда йўл қўйилган қонунбузилишлар юзасидан чора кўриш учун ҳуқуқни муҳофаза қилувчи органларга маълумот киритилган.
