Россияда уйсиз қолиб кетган ўзбекистонлик фуқаро оиласи билан ватанга қайтарилди
Санкт-Петербургда мураккаб молиявий аҳволда ва яшаш жойисиз қолган ўзбекистонлик фуқарога ёрдам кўрсатилди. Бу ҳақда Ташқи меҳнат миграцияси агентлиги хабар берди.
Қайд этилишича, 2022 йил февраль ойида Россияга ишлаш учун келган ўзбекистонлик К.А. август ойида ишсиз қолгани сабабли Ташқи меҳнат миграцияси агентлигининг Санкт-Петербург шаҳридаги ваколатхонаси ҳамда Бош консулхонага вақтинча яшаш учун ётоқхона тўловини амалга оширишда ҳамда ватанга қайтишда ёрдам сўраб мурожаат қилган.
Натижада шу куннинг ўзида фуқаро К.А. фарзандлари билан агентликнинг Санкт-Петербургдаги вакиллиги томонидан Хорижда меҳнат фаолиятини амалга оширувчи фуқароларни қўллаб-қувватлаш ҳамда уларнинг ҳуқуқ ва манфаатларини ҳимоя қилиш жамғармаси ҳисобидан хостелга жойлаштирилди.
Шунингдек, фуқаронинг Ўзбекистондаги яқин қариндошлари кўмагида авиачипта олиб берилди ва Санкт-Петербург—Урганч йўналишидаги авиарейс билан ватанга қайтарилди.
