Шавкат Мирзиёев ва Эрон президенти Иброҳим Раисий икки мамлакат ўртасидаги кўп қиррали ҳамкорликни янада кенгайтириш масалаларини муҳокама қилмоқда. Бу ҳақда президент матбуот котиби хабар берди.
Самарқанд шаҳрида расмий ташриф билан бўлиб турган Эрон президенти Иброҳим Раисийни тантанали кутиб олиш маросими бўлиб ўтди. Давлат раҳбарлари шарафига фахрий қоравул саф тортди, давлат мадҳиялари янгради. Шундан сўнг икки мамлакат раҳбарларининг учрашуви бўлиб ўтди.
Мулоқот диққат марказида ўзаро савдо ҳажмини ошириш, кооперацияни кучайтириш, саноат, инновациялар, қишлоқ хўжалиги, энергетика, транспорт ва логистика, бошқа устувор йўналишларда қўшма лойиҳаларни амалга ошириш масаласи турибди.
Шунингдек, минтақада самарали транспорт йўлакларини ривожлантириш имкониятлари кўриб чиқилади.
Ўзбекистон ва Эрон етакчилари долзарб минтақавий масалалар, шу жумладан, Афғонистонда юзага келаётган вазият, ШҲТ доирасидаги кўп томонлама ҳамкорлик масалаларини ҳам муҳокама қилади.
Аввалроқ Эрон Ислом Республикаси президенти Сайид Иброҳим Раисий Самарқанд шаҳрига етиб келгани ҳақида хабар берилган эди. Таъкидлаш лозимки, ушбу ташриф Эрон етакчисининг сўнгги 20 йилдаги илк ташрифидир.
Изоҳ (0)