«Реал» 2021/22 йилги мавсумда молиявий томондан қанча фойда олгани маълум бўлди

«Реал» 2021/22 йилги мавсум бўйича молиявий ҳисоботни эълон қилди.

Мадрид клуби 2020 йил март ойидан буён коронавирус пандемияси туфайли 400 миллион евро йўқотган бўлса-да, ушбу молиявий йилни 13 миллион евро даромад билан якунлаганини маълум қилди.

«‘Реал’ пандемия бошланганидан кейинги уч йилни даромад билан якунлашга муваффақ бўлди. 2019/20 йилги мавсум солиқлардан кейин 313 минг евро, 2020/21 йилда эса солиқлардан кейин 874 минг евро фойда билан чиққан эди. Жамоа ушбу йиллар давомида молиявий йўқотишларга учрамаган кам сонли Европа топ-клубларидан бирига айланди», — дейилади баёнотда.

Мана шу йиллар ичида «қаймоқранглилар» клубнинг соф активлари қийматини оширишга муваффақ бўлди. 2022 йил 30 июнь ҳолатига кўра, у 546 миллион еврога етди.

«Мадрид»нинг операцион фойдаси ўтган йилгига нисбатан 10 фоизга (69 миллион евро) ошди. Ҳозир эса у 722 миллион еврони ташкил этади.

«Реал Мадрид»нинг нақд пул қолдиғи 2022 йил 30 июнь ҳолатига кўра 425 миллион еврога етди. «Сантьяго Бернабеу»ни таъмирлаш лойиҳаси харажатларини ҳисобга олмаганда, мадридликларнинг соф қарзи 263 миллион еврони ташкил этади.