«Барселона» қишда Пике, де Йонг ва бошқа бир қатор футболчилар билан хайрлашмоқчи

«Барселона» қишки трансфер ойнасида бир қатор юқори маош олувчи футболчилардан қутулмоқчи.

Каталон клуби раҳбарияти ёзги трансфер ойнасида бошланган «тозалаш»ни қишда якунлаб қўяди, дея хабар қилмоқда Diario Sport.

Асосий мақсад маошлар ведомостини қисқартириш бўлади. Ёзда бирорта футболчи маошининг камайтирилишига рози бўлмаган. Фақат Мартин Брэйтуэйт, Миралем Пьянич ва Рики Пучнинг кетишигина ведомостни қисқартиришга эришилган.

Яқинлашиб келаётган трансфер ойнасида «Барселона» юқори маошга эга ва мураббийлар штаби учун у қадар керакли бўлмаган футболчилар билан хайрлашишга ҳаракат қилади.

Гап ҳимоячилар Херард Пике, Хорди Альба, ярим ҳимоячи Френки де Йонг ва ҳужумчи Мемфис Депай ҳақида бормоқда. Уларнинг барчаси жамоанинг юқори маош олувчи ўйинчилари қаторига киради.

Бундан ташқари каталонлар қишда жамоа таркибини тартибга келтирмоқчи. Айни вақтда «Барселона»да беш нафар марказий ҳимоячи ва уч нафар чап қанот ҳимоячиси бор.