“Barselona” qishda Pike, de Yong va boshqa bir qator futbolchilar bilan xayrlashmoqchi

“Barselona” qishki transfer oynasida bir qator yuqori maosh oluvchi futbolchilardan qutulmoqchi.

Katalon klubi rahbariyati yozgi transfer oynasida boshlangan “tozalash”ni qishda yakunlab qo‘yadi, deya xabar qilmoqda Diario Sport.

Asosiy maqsad maoshlar vedomostini qisqartirish bo‘ladi. Yozda birorta futbolchi maoshining kamaytirilishiga rozi bo‘lmagan. Faqat Martin Breytueyt, Miralem Pyanich va Riki Puchning ketishigina vedomostni qisqartirishga erishilgan.

Yaqinlashib kelayotgan transfer oynasida “Barselona” yuqori maoshga ega va murabbiylar shtabi uchun u qadar kerakli bo‘lmagan futbolchilar bilan xayrlashishga harakat qiladi.

Gap himoyachilar Xerard Pike, Xordi Alba, yarim himoyachi Frenki de Yong va hujumchi Memfis Depay haqida bormoqda. Ularning barchasi jamoaning yuqori maosh oluvchi o‘yinchilari qatoriga kiradi.

Bundan tashqari katalonlar qishda jamoa tarkibini tartibga keltirmoqchi. Ayni vaqtda “Barselona”da besh nafar markaziy himoyachi va uch nafar chap qanot himoyachisi bor.