МИБ томонидан аукционга қўйилган Тошкентдаги ҳовли бошланғич нархидан икки баробар арзонга сотилди

Тошкент шаҳар Мирзо Улуғбек туманидаги ҳовли кимошди савдосига қўйилган эди. «E-auksion» порталидаги маълумотларга кўра ҳовли сотилган.

Лот аукционга жиноят ишлари бўйича суд ҳукми билан Мирзо Улуғбек тумани МИБ томонидан жойлаштирилган эди. 2 қаватли уй 10 хонадан иборат. 

Ер участкасининг умумий майдони 0,13 гектар. Бинонинг майдони — 839 квадрат метр. Ҳовлида газ, сув, электр таъминоти ва канализация мавжуд.

Лот изоҳида ёзилишича, хонадонда одамлар истиқомат қилади.

Аукционга қўйилган ҳовлининг бошланғич баҳоси 10 млрд сўм эди. 6 сентябрь куни бўлиб ўтган савдода ҳовли қарийб икки баробарга — 5,6 млрд сўмга сотилди. 

Аукцион ғолиби сифатида Хуршид Зухуров кўрсатилган. У «Lord Kids», «Мarini-uz» ва «Тоmato Prо» каби еттита компаниянинг таъсисчиси ҳисобланади.