Buxoro viloyatining G‘ijduvon tumanidagi “Buktaroy” mahalla fuqarolar yig‘inida yashovchi fuqaro 80 yoshli keksa qo‘shnisini do‘pposlagani uchun javobgarlikka tortildi. Bu haqda “Daryo”ga Jinoyat ishlari bo‘yicha G‘ijduvon tuman sudi sudyasi ma’lum qildi.
Janjal keksa otaxonning gulzoriga to‘p tepib kiritaverib, uni poymol qilgan 8 yashar bolaning xatti-harakatlaridan boshlangan. Bola keksa otaxon tomonidan bir necha marotaba ogohlantirilgan, ammo bola tartibga kelish o‘rniga uni masxaralab qochgan”, — deydi sudya Boborahim Ochilov.Sud hujjatlarida qayd etilishicha, 8 yashar D.X. ko‘chada qo‘shni bolalar bilan koptok o‘ynab, to‘pni otaxonning gulzoriga o‘tkazib yuborgan. Qariyaning ogohlantirishiga qaramay, bola sho‘xlik qilib, otaxonni masxaralab, to‘p tepib, gulzorga kiritishda davom etgan. Bundan jahli chiqqan 80 yoshli qariya esa bolani nojo‘ya so‘zlar bilan haqoratlagan. Bola esa uyiga kirib, otasi D.M.ga qo‘shni chol uni haqoratlaganini aytgan. Ota esa baqir-chaqir qilib, qariyaning hovlisiga bostirib kirgan. Va otaxonning ko‘ziga, yuziga mushtlab urib, tan jarohati yetkazgan. Voqeaga guvoh bo‘lgan qo‘shni xotin qo‘shnilarni yordamga chaqirgan. Birozdan so‘ng voqea joyiga tez tibbiy yordam xodimlari hamda profilaktika inspektori yetib kelgan.
Keksa otaxon bir necha kun tuman shifoxonasida yotib davolangan. So‘ng otaxonning ko‘zi Toshkent shahrida jarrohlik yo‘li bilan operatsiya qilingan. Aybdor esa oradan shuncha vaqt o‘tishiga qaramay, qariya holidan xabar olmagan va aybiga iqrorlik bildirmagan. Qo‘shnilar va guvohlar ishtirokida D.M.ning noto‘g‘ri xatti-harakati o‘z tasdig‘ini topgan.
Zo‘ravon qo‘shni sudda aybdor deb topilib, unga nisbatan 6 oy muddatga ozodlikdan mahrum qilish jazosi tayinlangan.
Aybdor tayinlangan jazoni manzil tartibli koloniyalarda o‘taydi. Ammo uning jazoni o‘tashi qariyaning salomatligini tiklashga sarflangan xarajatlari qoplamaydi degani emas. Jinoyat oqibatida yetkazilgan zarar aybdor tomonidan to‘liq qoplanadi”, — deydi Boborahim Ochilov.
Izoh (0)