Тошкентнинг Чилонзор туманида Dream House Stroy МЧЖ томонидан 58 туп ҳар хил турдаги манзарали дарахтлар ноқонуний кесиб ташлангани аниқланганди. Бош прокуратура матбуот котиби ҳолат юзасидан жиноят иши қўзғатилганини маълум қилди.
Компания дарахтларни кесмаслик ҳақида кафолат хати тақдим этган, Экология бошқармаси томонидан дарахтлар кесилишига рад жавоби берилганига қарамай, уларни кесиб ташлаганди. Бунинг оқибатида табиатга 797,7 миллион сўм миқдорда зарар етказилган.
Ўтказилган текшириш натижасига кўра, қурувчи ташкилот мансабдор шахсларига нисбатан Жиноят кодексининг 198-моддаси 3-қисми (экинзорларни, ўрмонларни, дарахтларни ёки бошқа ўсимликларни шикастлантириш ёхуд нобуд қилиш) билан жиноят иши қўзғатилган. Тергов ҳаракатлари олиб борилмоқда.
Эслатиб ўтамиз, август ойининг бошларида Чилонзорда йўл кенгайтириш ишларида 101 туп дарахт илдизи шикастланиб, ўсимлик дунёсига 420 миллион 450 минг сўм миқдорида зарар етказилганди. Бунинг ортидан Чилонзор тумани ҳокими Шавкат Мавлонов ва прокурори Иззатилла Бозоров лавозимидан озод этилганди.
Мавзуга доир: Тошкентда қурилиш ишлари жараёнида 12 туп дарахтга шикаст етказилгани аниқланди
Изоҳ (0)