Пиджак, пальтолар ва бошқа устки кийимларни танлашда эҳтиёт бўлиш керак: устки кийим — бу гардеробнинг энг муҳим элементларидан биридир. Marie Claire нашри аёллар кўпинча йўл қўядиган хатолар ҳақда сўз юритди.
Устки кийим гардеробдаги энг қиммат буюмлардан биридир. Шунинг учун бу нарса бир мавсумдан кўпроқ вақт давомида хизмат қилиши керак. Бунинг учун эса, аввало, кийимни қандай танлашни билиш керак, энг муҳими, услубни бузадиган хатолардан қандай қочиш керак.
Агар пальто, плаш, кардиган ва шунга ўхшаш узун устки кийимлар танлаш керак бўлса, уларни имкон қадар болдир қисмига тушадиганини олиш тавсия этилади. Бундай узунликдаги устки кийимлар юбка, кўйлак, шим ёки бошқа комбинация билан ҳам ажойиб кўринишни ҳосил қилади.
Устки кийим танлашда ранг алоҳида аҳамиятга эга. Кейинги мавсумда қандай ранг урфда бўлиши мавҳум масала. Шунинг учун уларни нейтрал рангда бўлиши мақсадга мувофиқ. Оқ, қора, қаймоқ ранг, кул ранг, жигарранг ёки тўқ кўк каби қалин устки кийимлар узоқ муддат давомида кўзга ташланмайди.
Кенг ёқалар, бурмали безаклар ва турли хил бичимдаги устки кийимларга ҳам камроқ устунлик бериш керак. Чунки мавсум мобайнида турли хил услублар урфга киради. Классик услублар эса ҳамиша тенденцияга мувофиқ равишда ўз аҳамиятини йўқотмайди. Мутахассислар бу масалада кўпроқ оддий бичимдаги классик устки кийимларни тавсия этади.
Устки кийимлардан жой олган йирик тугма, замок ёки белбоғ ҳам образга путур етказиши мумкин. Сабаби улар либоснинг қийматини туширади. Яхшиси, устки кийим танлаганда қўшимча деталлари бўлмаган моделларни танлаш образни янада бойитади.
Устки кийим нақшларини ҳам бу борада эътиборсиз қолдириб бўлмайди. Сабаби кўйлак ёки юбка нақшли бўлса, устки кийимлар улардан холи бўлгани маъқул. Образ яратишда барча кийимнинг нақшлисига устунлик бериш бачканаликни келтириб чиқаради.
Шунингдек, пальто ёки бошқа устки кийимлар имкон қадар табиий матодан тикилган бўлиши лозим. Чунки улар қишда иссиқ тутади. Синтетика, чарм ёки бошқа турдагилари шунчаки чиройли кўринишга эга бўлиши мумкин холос.
Узоқ муддат урфда бўлган курткалар бир-икки мавсумдан кейин ўз кўринишини йўқота бошлайди. Шунинг учун ички қисми пат ёки пар билан тўлдирилган қишки кийимлардан қочиш керак. Бу каби курткаларни танлашда табиий воситалардан тайёрланган кийимлар узоқ вақт хизмат қилади.
Изоҳ (0)