Европа ядро тадқиқотлари маркази (CERN) энергия тармоғига юкламалар авжига чиққан пайтда зарраларни тезлатувчиларнинг баъзиларини ўчириб қўйиш бўйича режани ишлаб чиқмоқда, деб ёзади Meduza. Бу ҳақда The Wall Street Journal’га берган интервьюсида CERN’нинг энергетика бўлинмаси раҳбари Серж Клоде маълум қилган.
Унинг сўзларига кўра, CERN, шунингдек, зарурият юзага келса, Катта адрон коллайдерининг ишини тўхтатиш имкониятини ҳам кўриб чиқмоқда. 4,4 миллиард долларлик дунёдаги энг катта зарраларни тезлатувчи — Катта адрон коллайдери CERN’нинг саккизта тезлатувчиларидан биридир.
«Бизни ҳақиқатан ҳам энергия тизимининг барқарорлиги ташвишга солмоқда, чунки биз ўз минтақамизда электр токи ўчирилишининг олдини олиш учун бор имкониятимизни ишга соляпмиз», — деди Серж Клоде. Унинг аниқлик киритишича, CERN коллайдерни издан чиқариши мумкин бўлган тасодифий тўхтаб қолишнинг олдини олиш учун CERN Катта адрон коллайдерининг фаолиятини қўллаб-қувватлаб туришга ҳаракат қилмоқда.
Франция-Швейцария чегарасида жойлашган CERN — Франциядаги энг йирик электр энергияси истеъмолчиларидан бири. Авж нуқтада марказ қарийб 200 МВт истеъмол қилади, бу энг яқиндаги шаҳар — Швейцариянинг Женевасидагидан уч марта кўпроқ демакдир.
Серж Клоде айтишича, олимлар электр энергияси етказиб берувчи Франциянинг EDF компанияси билан музокаралар олиб бориб, электр энергияси истеъмолини қисқартириш кераклиги ҳақида марказни бир кун олдиндан огоҳлантиришни сўрамоқда. CERN электр энергияси истеъмолини 25 фоизга камайтириш учун Катта адрон коллайдеридан ташқари бошқа тезлатувчиларни ҳам ўчиришни режалаштирмоқда.
Катта адрон коллайдерида жами 27 километрлик тезлатувчи ҳалқа бўйлаб ўта ўтказувчан магнитлар жойлашган бўлиб, уларни чуқур совитиш учун жуда катта миқдорда энергия талаб этилади. CERN огоҳлантиришича, агар магнитларни совитиш вақтинчалик ўчириб қўйилса, Катта адрон коллайдеридаги тажрибалар бир неча ҳафталарга тўхтаб қолади.
Коллайдерни режали ўчириш камида йилига бир марта амалга оширилади, одатда у қиш ойларига тўғри келади, шимолий ярим шарда энергия истеъмолининг авж нуқтаси одатда шу пайтда кузатилади. Катта адрон коллайдерига хизмат кўрсатиш графигига мувофиқ, CERN тезлатувчини режага мувофиқ 2022 йил декабрида ўчириши керак.
Катта адрон коллайдери — дунёдаги энг кучли зарра тезлатувчи. Коллайдер зарраларни ёруғлик тезлигига яқин кўрсаткичларгача тезлатади ва улар бир-бири билан тўқнашади. Унинг ёрдамида олимлар 2012 йилда Хиггс бозонини аниқлаган. 2018 йил декабрида коллайдер таъмирлаш учун тўхтатиб қўйилганди. Шу йилнинг июлида у қайтадан ишга туширилди.
Изоҳ (0)