Ўзбекистон Экология ва атроф-муҳитни муҳофаза қилиш давлат қўмитаси раиси Нарзулло Обломуродов ва Европа тикланиш ва тараққиёт банкининг Ядро хавфсизлиги департаменти директори Балтазар Линдауэр ўртасида мамлакатнинг Чоркесар ва Янгиобод махсус полигонларини рекултивация қилиш борасидаги саъй-ҳаракатларини қўллаб-қувватлаш бўйича грант лойиҳасини амалга ошириш тўғрисида битим имзоланди.
Таъкидланишича, 7 миллион еврога тенг грант шартномасини имзолаш маросими 1 сентябрь куни EТТБнинг Лондондаги штаб-квартирасида бўлиб ўтди. 2021 йилда Давлат экология қўмитаси ва EТТБ ўртасида консултатив ёрдам кўрсатилиши учун 2 миллион евро миқдоридаги биринчи битим имзоланган эди. Жами 9 миллион евро миқдоридаги грант лойиҳаси банк томонидан Марказий Осиё учун Атроф-муҳитни реабилитация қилиш экологик ҳисоби махсус фонди ҳисобидан молиялаштирилади.
Грант лойиҳаси доирасида 2022–2025 йиллар давомида махсус участкаларини экологик соғломлаштириш ва рекултивация қилиш тадбирлари амалга оширилади. Холисона ўтказилган экспертиза ҳамда хавф-хатарлар ва маҳаллий шароитларни комплекс экологик баҳолаш асосида мутахассислар ҳудудни рекултивация қилиш, қурилиш-монтаж, изоляция ва ҳимоя ишларини олиб бориш бўйича энг хавфсиз ва мақбул вариант ва режаларни танлаган.
Рекултивация ишлари 2023 йилнинг биринчи чорагида бошланиши режалаштирилган бўлиб, тахминан икки йил ичида якунланади. Лойиҳа доирасидаги қурилиш ва реабилитация ишлари маҳаллий ва германиялик мутахассислар иштирокида амалга оширилади.
Изоҳ (0)