Ўзбекистон сув тошқинлари юз берган Покистонга 1 сентябрь куни 40 тонна инсонпарварлик ёрдами жўнатгани хабар қилинганди. «Дунё» ахборот агентлигининг ёзишича, гуманитар юк Исломободга етказилди.
Қайд этилишича, Покистонга ҳарбий самолёт орқали озиқ-овқат маҳсулотлари, шу жумладан, ўсимлик ёғи, ун, гуруч, гўшт консервалари, қандолат ва макарон маҳсулотлари, шунингдек, тўқимачилик маҳсулотлари ва бошқа товарлардан иборат қарийб 40 тонна юк етказилди.
Покистон ҳукумати номидан юкни Исломобод халқаро аэропортида федерал фан ва технологиялар вазири Агҳа Ҳасан Балоч кутиб олди.
Бугун биз бошимизга оғир кунларда биринчилардан бўлиб мадад қўлини чўзган ўзбек биродарларимиз ва опа-сингилларимизнинг чинакам ҳамдардлик туйғуларига гувоҳ бўлмоқдамиз. Покистон ҳукумати ва халқи қардош Ўзбекистон раҳбарияти ва халқининг саховати ифодасини юксак қадрлайди, — деди вазир.Покистон Ташқи ишлар вазирлиги департаменти бош директори Шоҳ Файсал Какар томонидан ҳам Марказий Осиё давлатлари билан ҳамкорлик учун миннатдорчилик сўзлари айтилди.
Эслатиб ўтамиз, сўнгги бир неча ҳафта ичида Покистонда мисли кўрилмаган муссон ёмғирлари ва сув тошқинлари 30 миллиондан ортиқ кишининг кундалик ҳаётини издан чиқарган. Мамлакатнинг ғарби ва жанубидаги Балужистон ва Синд провинциялари энг кўп зарар кўрган. Юз минглаб одамлар бошпанасиз қолган.
Кучли ёмғир ва кенг кўламли тошқинлар оқибатида 1100 дан ортиқ одам вафот этган. Расмийларга кўра, бу йил сув тошқинлари билан боғлиқ вазият 2010 йилга қараганда жиддийроқ, ўша йили табиий офат оқибатида 1,7 минг киши ҳалок бўлган.
Айни пайтда Покистон турли давлатлардан халқаро ёрдам олишни бошлади. Жумладан, Туркия ва Бирлашган Араб Амирликларидан чодирлар ва зарур маҳсулотлар ортилган самолётлар етиб борган.
Изоҳ (0)