Запорожье АЭС биноларига отишмалар натижасида зарар етказилган, деди Халқаро атом агентлиги (МАГATЭ) раҳбари Рафаэль Гросси журналистларнинг саволларига жавоб бераётиб.
«Атом станцияси, унинг моддий қобиғи бир нечта жойдан вайрон бўлгани аниқ-равшан. Бу тасодифан бўлганми, атайлаб қилинганми — буни аниқлай олмаймиз. Аммо бу ҳақиқат», — деди Гросси.
Унинг сўзларига кўра, иккала томон қандай сиёсий қарашларга эга бўлишидан қатъи назар, станция вайрон бўлишда давом этмаслиги керак.
МАГATЭ экспертлари станциянинг ҳолати ҳақида кўпроқ техник маълумот йиғиш ва инспекция ҳақида ҳисобот тайёрлаш учун у ерда 4—5 сентябргача қолади. «Шундан кейин биз МАГATЭнинг станциядаги доимий ваколатхонасими, шунга ўхшаш бирон нарса ташкил қилмоқчимиз, экспертлар бизга станцияда бўлаётган воқеалар ҳақида мунтазам равишда холисона ҳисобот бериб туришлари учун», — деди Гросси.
Аввалроқ Украина президенти Владимир Зеленский Россия Запорожье АЭСга МАГATЭ миссияси билан бирга кирмоқчи бўлган мустақил журналистларни қўймаганини маълум қилганди.
1 сентябрь куни урушнинг илк кунлариданоқ Россия ҳарбийлари назорати остида бўлиб турган Запорожье АЭСга Халқаро атом энергияси агентлиги (МАГATЭ) миссияси етиб келди, у Европанинг энг йирик атом электр станциясида вазиятни баҳолаши керак. Станциянинг кўздан кечирилиши акс этган лавҳалар Россия давлат агентликлари томонидан эълон қилинди.
Станция ташкилот томонидан кўздан кечирилганидан кейин, унинг раҳбари Рафаэль Гросси миссиянинг бир нечта аъзолари у ерда қолиб ишни давом эттиришини маълум қилди.
МАГATЭ миссияси ташрифидан олдин Россия Мудофаа вазирлиги Украинани станцияни эгаллаб олишга уринишда айблаганди.
ЗАЭС ва Энергодар шаҳри мунтазам равишда ўққа тутилиб келади. Украина ва Россия буни бир-бирига тўнкайди. АЭСнинг украиналик ходимлари Россия хавфсизлик кучлари уларни ҳибсга олиб, қийноқларга солгани ва МАГATЭ инспекторларидан станция хавфсизлиги учун рискларни яширишни талаб қилгани ҳақида журналистларга сўзлаб берган.
Изоҳ (0)