Шавкат Мирзиёевнинг Арманистон бош вазири Никол Пашинян билан 30 август куни телефон орқали мулоқоти бўлиб ўтди. Бу ҳақда президент матбуот хизмати хабар берди.
Қайд этилишича, Арманистон ҳукумати раҳбари Ўзбекистон етакчисини яқинлашиб келаётган миллий байрам — Мустақиллик куни билан самимий табриклаб, халққа тинчлик-осойишталик, фаровонлик ва равнақ тилади. Икки томонлама муносабатларни ва халқаро ташкилотлар доирасидаги ҳамкорликни ривожлантиришнинг долзарб масалалари кўриб чиқилди.
Амалий ҳамкорликни илгари суришнинг муҳим жиҳатларига алоҳида эътибор қаратилди. Ўзаро савдо ҳажмини ошириш, ишбилармон доиралар ва етакчи корхонларни фаол жалб қилган ҳолда кооперация лойиҳаларини амалга ошириш, савдо-иқтисодий ҳамкорликни кенгайтириш учун самарали механизмларни шакллантиришдаги мавжуд имкониятлар қайд этилди.
Минтақавий кун тартиби ва кўп томонлама тузилмалар доирасидаги мулоқотни кенгайтириш юзасидан ҳам фикр алмашилди.
Мавзуга доир: Шавкат Мирзиёев Лукашенкони туғилган куни билан табриклади
Изоҳ (0)