Тошкентнинг Чилонзор туманидаги кўприк бўйлаб Lacetti қарама-қарши йўналишда ҳаракатлангани, шундан сўнг машина жарима майдонига жойлаштирилгани ҳақида хабар берилганди. Жамоат хавфсизлиги департаменти ҳолат юзасидан қўшимча маълумот берди.
Қайд этилишича, ҳайдовчига нисбатан маъмурий баённома расмийлаштирилгач, тегишли ҳужжатлар тўпланиб, кўриб чиқиш учун жиноят ишлари бўйича Чилонзор тумани судига юборилган. Судда юборилган ҳужжатлар кўриб чиқилиб, фуқаро Ж.М.га суд ҳукми ўқилди.
Унга кўра, ҳуқуқбузар Маъмурий жавобгарлик тўғрисидаги кодекснинг 183-моддаси (майда безорилик) ва 194-моддаси (ички ишлар органлари ходимининг қонуний талабларини бажармаслик)да назарда тутилган ҳуқуқбузарликларни содир этган деб топилди ва у 15 сутка маъмурий қамоқ жазоси тайинланди.
Шунингдек, фуқарога базавий ҳисоблаш миқдорининг 2 баравари (600 минг сўм) миқдорида жарима қўлланилди.
Изоҳ (0)