АТБ «Агробанк» «Дарё» интернет-нашри ва сайт журналисти Отабек Қўлдошевни нохолисликда айблаб, судга мурожаат қилгани ҳақида хабар берилганди. Суд залида бўлган «Дарё» мухбирининг хабар беришича, даъвогарлар бугунги суд мажлисига келмаган.
«Агробанк»нинг даъво аризасини кўриб чиқиши белгиланган Фуқаролик ишлари бўйича Мирзо Улуғбек туманлараро суди судьяси Олимжон Қораевнинг вазиятга аниқлик киритишича, даъвогар вакилининг тоби қочиб қолган.
Шу сабабли ишни бошқа кунга қолдиришга мажбурмиз. Боиси суд залига даъвогарларнинг ўзи келмаган. Биз вазиятга аниқлик киритишга уринганимизда даъвогар вакили тоби йўқлигини айтди, — дейди судья.Эслатиб ўтамиз, банкирлар «Дарё» сайтидаги журналист Отабек Қўлдошев муаллифлигида эълон қилинган «Қашқадарёлик тадбиркор банклардан ярим миллиарддан ортиқ маблағини ололмагач, аҳолига тарқатилган чорва молларини тортиб олмоқда» сарлавҳали мақолага эътироз билдириб, сайт ва сайт журналистини нохолисликда, мавзуга бирёқлама ёндашишда айблаган эди. Ҳолбуки, сайтда эълон қилинган мақолада «Агробанк»нинг ахборот хизмати масъули журналист сўровига тайинли жавоб бермагани, олти ой давомида «муаммо бугун ҳал бўлади, эртага ҳал бўлади»дан нарига ўтмагани ёзилган.
«Дарё» жамоаси банкирларнинг раддия бериш ҳақидаги талабини бажаришини, бироқ бунинг учун мақолада айнан банкнинг ишчанлик фаолиятига путур етказган, молия бозоридаги ҳуқуқ ва манфаатларининг бузилишига олиб келган, нохолис ёндашилган қисмини кўрсатиб бериш сўралганди. Бироқ, «Агробанк» таҳририятнинг мазкур сўровига жавоб беришни лозим топмаган.
Даъвогарлар суд мажлисига келмагани боис суд иши 2022 йилнинг 12 сентябрь куни соат 09:30 га қолдирилди.
Изоҳ (0)