Украинадаги уруш ва унинг ортидан Россияга қарши санкциялар туфайли Саудия Арабистонида қулай молиявий вазият юзага келди. Бу ҳақда Исроилнинг Globes газетаси хабар берди.
Қайд этилишича, Ар-Риёд нефть нархининг кўтарилиши эвазига катта пул ишлаб олди ва йирик компаниялар акциялари тушиб кетганидан фойдаланиб, Америка компанияларига етти миллиард доллар сармоя киритди.
Саудия Арабистонининг давлат нефть компанияси Aramco, Alphabet (Google’нинг бош компанияси), Amazon, Меtа, Microsoft, Costco, Starbucks ва бошқа кўплаб компанияларнинг акцияларини сотиб олди. Шу тариқа саудияликлар Вашингтондаги таъсирини кенгайтиришга умид қилмоқда.
Миллиардлаб долларлик сармоя АҚШ иқтисодиётини қўллаб-қувватламоқда. Шу билан бирга, саудияликлар Хитой компанияларининг акцияларини сотиб олмайди, яъни Пекин Саудия сармояларини қабул қилмайди.
Вашингтонда ўз таъсирини кенгайтириш орқали Ар-Риёд АҚШ ҳукуматидан, биринчи навбатда, Эрон ядровий келишуви бўйича ижобий қарорлар олишга умид қилмоқда.
Саудия ҳукумати санкцияларнинг бекор қилиниши ва Эронга ўнлаб миллиард доллар ўтказилиши Яқин Шарқ минтақасида салбий оқибатларга олиб келишидан қўрқади.
Аввалроқ араб мамлакатлари нефтдан қўшимча 1,3 трлн доллар даромад олиши ҳақида хабар берилган эди.
Изоҳ (0)