Сирдарё вилояти Мирзаобод туманида 1997 йилда вафот этган фуқаронинг ўлими 25 йил ўтиб қайд этилди.
М.Ш. фарзанди Ж.О.нинг ўлим тўғрисидаги гувоҳномасини олишда амалий ёрдам сўраб Мирзаобод туман адлия бўлимига мурожаат қилди.
Мурожаат бўлим томонидан иш юритувига олиниб, зарур ҳужжатлар тўпланди.
Аниқланишича, фуқаро М.Ш.нинг фарзанди Ж.О. 1997 йил 28 январда вафот этган ва Мирзаобод тумани Тинчлик маҳалласидаги «Парча юз» қабристонига дафн этилган. Бироқ, айрим сабабларга кўра унинг ўлими қайд этилмасдан қолган.
Ўрганиш жараёнида ФҲДЁ архиви томонидан берилган маълумотномаларга асосан 1994–2000–2022 йиллар текширилганда Ж.О.нинг ўлими ҳақидаги далолатнома ёзувлари мавжуд эмаслиги аниқланди.
Ўзбекистон Республикаси Фуқаролик-процессуал кодексининг 283-моддаси 10-бандига кўра, юридик аҳамиятга эга бўлган бошқа фактларни, агар қонун ҳужжатларида уларни белгилашнинг бошқача тартиби назарда тутилган бўлмаса, белгилашга оид ишларни кўради.
Ўзбекистон Олий суди Пленумининг 1991 йил 20 декабрдаги 5-сонли «Юридик аҳамиятга эга бўлган фактларни белгилаш ҳақидаги ишлар бўйича суд амалиёти тўғрисида»ги қарорининг 20-бандига кўра, агар шахснинг маълум вақт ва маълум ҳолатда вафот этганлигини тасдиқловчи ишончли далиллар мавжуд бўлса, Фуқаролик процессуал кодекси 295-моддасининг 10-бандига асосан суд ўлганлик фактини белгилайди.
Юқоридагиларга асосан, туман адлия бўлими томонидан Фуқаролик ишлари бўйича Гулистон туманлараро судига ариза киритилди. Натижада Мирзаобод туман адлия бўлимининг фуқаро Ш.М.нинг манфаатида киритилган аризаси қаноатлантирилиб, суднинг ҳал қилув қарори билан Ж.О.нинг ўлганлик факти белгиланди.
Изоҳ (0)