1 август куни Сурхондарё вилоятидаги Орол Пайғамбар ороли ҳудудида бир гуруҳ Афғонистон фуқаролари давлат чегарасини бузиб ўтгани хабар қилинганди. Ташқи ишлар вазирлиги Афғонистон ва Ўзбекистон давлат чегарасидаги ҳодиса бўйича маълумот берди.
Қайд этилишича, Афғонистон ва Ўзбекистон Республикаси махсус хизматларининг ваколатли вакиллари ўртасида Давлат чегарасида вужудга келган вазият бўйича музокаралар ўтказилган.
2022 йил 21 августда Афғонистон фуқаролари томонидан Ўзбекистон Давлат чегарасини ноқонуний кесиб ўтиш билан боғлиқ Пайғамбар ороли (Сурхондарё вилояти) ҳудудида юз берган ҳодиса муҳокама қилинган.
Учрашув давомида ҳар икки томондан ҳам мазкур ҳудудда тарангликни юзага келтирган айрим қоидабузарликларга йўл қўйилгани қайд этилган.
Ҳозирги пайтда ҳодиса юзасидан пухта текширувлар ўтказмоқда.
«Ўзбекистон Республикаси икки нафар ҳалок бўлганларнинг оилаларига таъзия билдиради, олти нафар яраланганларга барча зарур тиббий ёрдам кўрсатилмоқда, ушланган шахсларни ўз ватанига қайтаришга тайёрлаш жараёнлари якунланмоқда.
Ҳар икки томон тинчлик тарафдори эканлигини, барча масалалар ўзаро манфаатларни ҳисобга олиш ва бир-бирига ҳурмат асосида ҳал этилишини тасдиқладилар», — дейилади хабарда.
Изоҳ (0)