Президент Шавкат Мирзиёев бугун. 22 август куни тадбиркорлар билан очиқ мулоқот ўтказди. Шавкат Мирзиёев мулоқотда 5 та йўналиш бўйича ташаббусларни билдирди.
«Дарё» мухбири мазкур очиқ мулоқот юзасидан тадбиркор Мурод Назаровдан изоҳ олди.
Компания миқёсида айтадиган бўлсак, ҳар бир компания ўзининг стратегиясини тузади. Шу билан шуғулланиб, иш давомида яна шу стратегияга қайтилади, тўғри йўлдамизми, йўқми, қараб туриш учун. Менимча, тадбирнинг асл моҳияти ҳам шундаки, мамлакатимизни ривожлантириш мақсад қилинган. Унда тадбиркорлик ва хусусий бизнесни ривожлантиришга алоҳида урғу берилган. Унга кўп имкониятлар яратиляпти, кўп ислоҳотлар олиб бориляпти ва ҳар йили президентнинг шахсан ўзи тадбиркорлар билан юзма-юз кўришиб, савол-жавоб, мурожаат, барча муаммоларини эшитиш билан тўғри йўлда кетяпмизми, йўқми, шуни билиб олиш учун ўтказилмоқда. Ушбу тадбир жуда ҳам муҳим. Шахсан президентнинг ўзи бунга бош-қош бўлиб, ҳар бир тадбиркорнинг мурожаатидан хабардор бўлишлари бошқа давлатларда ҳам борми, йўқми билмайман.Биз ўтган йилги учрашувда бир қатор таклифларимизни берганмиз. Агарда президент даражасида кўриб чиқиладиган мурожаат бўлганда айтишим мумкин эди. Лекин биз шу кунга қадар муаммоларимизни қонуний йўл билан ечишга ҳаракат қиляпмиз. Албатта, осон эмас. Лекин ўз қонуний ҳақ-ҳуқуқларимизни сўраб, бунга эришяпмиз. Президентга омад тилаб, ўз миннатдорчилигимни билдираман.
Аввал тадбиркорликда қўрқув бўлган эди, бизга тегишадими, йўқми, деган. Ҳозир бу қўрқув йўқ. Ҳозир қўрқувнинг бошқа шакли бор, рақобатда бизнесимни сақлаб қоламанми ва қўшимча яна ривожлантира оламанми, деган. Бу хавфсираш. Рақобат анчагина кучайди. Бу ҳам соғлом муҳитнинг ифодаси.
Тадбиркорлик соҳасида ҳали ҳам муаммолар бор, лекин аввалгидан кам. Буларнинг асл негизида, асосий ислоҳот қаратилиши керак бўлган йўналиш — қонуннинг устуворлиги. Яъни, қонун — ҳар бир фуқаро, ҳар бир тадбиркор, ҳар бир инсон учун амалда адолатли бўлиши керак. Ўшанда қолган ҳамма ислоҳотлар ўз самарасини кўрсатади деб ўйлайман.
Мурод Назаров, тадбиркор
Изоҳ (0)