Қашқадарё вилоятида 2022 йилнинг ўтган етти ойи давомида Давлат кадастрлари палатаси вилоят бошқармаси ва унинг филиаллари томонидан 25 минг нафар кишига тегишли ер участкаси ва кўчмас мулкка кадастр паспорти берилган. Бу ҳақда «Дарё»га Давлат кадастрлари палатаси вилоят бошқармаси ахборот хизмати раҳбари Намоз Чориев маълум қилди.
Қайд этилишича, бундан ташқари 2500 та юридик ташкилотга тегишли ер участкалари ва кўчмас мулкларга ҳам кадастр паспорти тайёрлаб берилган.
«Шунингдек, вилоятда 28,6 мингта ер участкаси ва кўчмас мулкка бўлган ҳуқуқлар ҳамда тузилган битимлар, 3,3 мингта қурилиши якунланган бино ва иншоотни фойдаланишга қабул қилиш ҳақидаги далолатномалар давлат рўйхатидан ўтказилган. Тадбиркорлик мақсадлари учун вилоятда 2193 та ер участкаси очиқ электрон онлайн аукцион савдоларига қўйилган», — дейди бошқарма ахборот хизмати раҳбари Намоз Чориев.
Шунингдек, қишлоқ хўжалиги мақсадларида деҳқон хўжалиги ташкил этиш учун онлайн электрон танлов орқали келган 16,3 минг та лот давлат рўйхатидан ўтказилган.
«Бугунги кунда Қашқадарё вилойтида 2 миллион 321 минг 391 гектар қишлоқ хўжалиги ери мавжуд. Вилоятда фаолият олиб бораётган кадастр ходимлари томонидан айни кунгача 2 миллион гектарга яқин қишлоқ хўжалиги ер майдонларига оид маълумотлар кадастр ахборот тизимида ҳисобга олинган. Шунингдек, мазкур ахборот тизимига вилоятдаги кўп қаватли уйлар ҳақидаги маълумотларни киритиш ишлари давом этмоқда. Бугунга келиб, вилоятдаги 2 минг 257 та кўп қаватли тураржойнинг 1293 таси тизимга муваффақиятли киритилган», — дейди бошқарма ахборот хизмати масъули.
Қўшимча қилинишича, жорий йилнинг ўтган даври мобайнида бошқарма томонидан 15 минг 998 та турар жой, 8021 та нотурар жой ва 4 630 та кўп қаватли турар-жой жами 28 649 та кўчмас мулкка бўлган ҳуқуқлар давлат рўйхатидан ўтказилган.
Изоҳ (0)