Ёз — соғлиққа ғамхўрлик қилиш ва совуқ ҳаво бошланганда касал бўлмасликка ёрдам берадиган янги фойдали одатларни шакллантириш учун ажойиб вақт. Педиатр, патофизиолог ва иммунолог Елена Парецкая организмни қишга тайёрлаш учун ёзни қандай ўтказиш кераклиги ҳақда тавсиялар бериб ўтди, деб ёзади Marie Claire.
Иложи борича пиёда юринг
Оддий юришнинг организм учун фойдалари кўп. Агар жуда узоқ бўлмаса, ишга пиёда боришга ҳаракат қилиш ёки машинани офисдан бироз узоқда қолдириш тавсия этилади. Шунингдек, бир ёки иккита метро бекатидан олдинроқ тушиш ҳам мумкин. Мутахассиснинг маълум қилишича, юриш ёки юриш тезлигини ошириш энергия сарфлашга ёрдам беради.
Гаджетлардан воз кечинг
Гаджетларсиз дам олишни ўрганинг. Агар буни ишда қилишнинг иложи бўлмаса, уйда улардан иложи борича камроқ фойдаланиш керак, айниқса компьютердан воз кечиш лозим. Бу кўзни чарчатади, умуртқа поғонаси ва мияни доимий стресс ва зўриқишда ушлаб туради.
Кўзлар учун энг яхши дам олиш уфқни томоша қилишдир. Шунинг учун дам олиш кунлари шаҳар ташқарисига чиқиб, шовқиндан узоқда табиат қўйнида завқланиш керак. Бундан ташқари, табиий ранглар кўриш қобилиятига ижобий таъсир кўрсатади.
Классик мусиқа тингланг
Унинг товушлари метаболизмга ижобий таъсир кўрсатади, уйқуни яхшилайди ва асаб тизимини рағбатлантиради. Классик мусиқа тинглаш жигар, ичак ва ошқозон ости бези фаолиятини яхшилайди ва ҳатто юрак уриш тезлигини меъёрга келтиради.
Тўр беланчакда дам олинг
Орқа мия доимий стрессга дучор бўлади, ҳатто организмнинг оғирлигини кўтариб чарчайди. Қолаверса, ҳамиша елкада олиб юриладиган сумкалар ҳам бунга қўшимча бўлади. Муаммони бартараф этиш учун зарур шарт-шароитларни яратиш жуда муҳим — энг яхшиси тўрли беланчакда дам олишдир. Беланчак умуртқа поғонасини бўшаштиришга ва мушакларни имкон қадар юмшатишга имкон беради. Бу умуртқа поғонасида қон айланишини яхшилаш, кўпинча безовталанадиган белдаги зўриқишни енгиллаштиришнинг осон усули.
Тош ва сув устида юринг
Албатта, буни денгиз қирғоғида, тошли пляжда амалга оширган яхшидир. Аммо бошқа йўллари ҳам бор — уй шароитида ҳам тошлар билан ҳаммомни безатиш мумкин. Елена Парецкаянинг таъкидлашича, тўпиқдан чуқур сувда қирғоқ бўйлаб юриш фойдалидир. Бу томирлар учун самарали, терини тозалайди, оёқларда рецепторларни безовта қилиб, иммунитет тизимини рағбатлантиради.
Овқатланиш одатларини янгиланг
Ёзда ичакларнинг фаолиятини яхшилаш учун ажойиб имконият бор. Рационга кўпроқ янги сабзавот, мева, резавор, кўкатларни қўшиш тавсия этилади, улар витаминларнинг ажойиб манбалари ҳисобланади. Тўғри овқатланиш қоидаларига риоя қилган ҳолда соғлиқ учун фойдали бўлган маҳсулотлар, шунингдек, минерал сув ичиш лозим. Уни эрталаб оч қоринга ва кечқурун, кечки овқатдан кейин ичиш тавсия этилади.
Изоҳ (0)