Нани: «Манчестер Юнайтед» бош мураббийи кучли жамоа қурмоқчи, Роналдуда эса буни кутишга вақт йўқ

«Манчестер Юнайтед» собиқ футболчиси Нани Криштиану Роналдунинг вазияти ҳақида гапирди.

Биз у билан анчадан буён бирга ўйнамаяпмиз, Криштиану энди ёш бола эмас. Барчаси ўзгаради, муносабатлар ўзгариши мумкин.

У аввал нима қилган бўлса, ҳозир ҳам шуни такрорлаяпти. У мағлубиятни ёқтирмайди, жамоа ёмон ўйнаса, бунга муносабатини билдиради. Биттагина фарқ — бу турли даврларда бўлган.

Роналду «Манчестер Юнайтед»да ва турли жамоаларда, дунёнинг турли футболчилари билан бирга тўп сурган. У ҳозирда кучли жамоа қурмоқчи бўлган мураббий (Эрик тен Ҳаг) қўл остида ўйнаяпти, бу осон бўлмайди. Бу вақт талаб қилади, Криштиануда эса жамоа қурилишини ёки кейинги мавсумни кутиш учун вақт йўқ.

Криштиану энг яхшиси бўлишни, юқорида қолишни, голлар уришни хоҳлайди. Мана нима учун унинг муносабатини тўғри қабул қилиш керак.

Нани, «Мелбурн Виктори» футболчиси