Enter Engineering компаниясида қурувчилар кунига бағишланган байрам бўлиб ўтди

Ўзбекистон — иқтисодий жиҳатдан жадал ривожланиб келаётган замонавий давлатдир. Сўнгги йилларда республикамизни йирик қурилиш майдончасига қиёслашмоқда. Ва бу бежиз эмас. Чунки қисқа вақт ичида минглаб янги иншоотлар – саноат корхоналари, турар-жой бинолари, ижтимоий соҳа объектлари қад ростлади.

Қурилиш саноати эса энг жадал ривожланаётган соҳалардан ҳисобланади. Президент Шавкат Мирзиёев ташаббуси билан «Ўзбекистон Республикаси қурилиш соҳаси ходимлари куни» эълон қилиниши, амалга оширилаётган бунёдкорлик ишларини жадаллаштириш йўлида ҳар куни меҳнат қилиб келаётган инсонларга нисбатан кўрсатилаётган эътибор ва эҳтиром намунасига айланди.

Enter Engineering компаниялар гуруҳи меҳнат жамоаларида ушбу касб байрамни кенг нишонлаш яхши анъанага айланган.

Бу йилги байрам тантаналари ОТМК негизидаги 3-МБФ, Бойсун ГҚИЗ, Самарқанддаги Silk Road Samarkand сайёҳлик маркази ва компаниянинг бошқа объектларидаги қурилиш майдонларида бўлиб ўтди.

Компания объектларида ишлаётган барча ходимлар учун бу кун унутилмас таассуротлар, ёрқин воқеаларга бой бўлди. Жойларда лойиҳа раҳбарияти вакиллари табрик нутқи билан сўзга чиқиб, ҳар бир ходимнинг умумий ишга қўшган унумли ҳиссаси, мураккаб табиий шароитларда меҳнат қилган ҳолда зиммаларидаги вазифаларни муваффақиятли амалга ошириб келаётган мутахассисларнинг самарали меҳнатини эътироф этди.

Илғор ишчилар диплом ва қимматбаҳо совғалар билан тақдирланди, байрамона дастурхон атрофида жам бўлиб, қурувчилар кунини кўтаринки кайфиятда ўтказди. Санъат усталарининг жўшқин куй ва қўшиқлари байрам оқшомига файз киритди.

Шуни ишонч билан айтиш мумкинки, бугунги кунда касб нуфузи янги сифат поғонасига кўтарилмоқда ва Enter Engineering компаниясининг ҳар бир ходими ишонч билан «Қурувчилик — фахрли касб» дейиши мумкин.